Batys Qazaqstan oblysynda taǵy alty turǵynnyń koronavirýs juqtyrǵany belgili boldy, dep habarlaidy "Ult aqparat".
Buǵan deiin habarlaǵanymyzdai, 18 sáýir saǵat 09.30-daǵy sońǵy málimetke sáikes, Qazaqstanda koronavirýske shaldyqqandar sany 1591-ge jetti. Onyń ishinde Batys Qazaqstanda jańadan 6 jaǵdai tirkeldi.
BQO-nyń shuǵyl shtabynan túsken aqparatqa qaraǵanda, naýqastardyń barlyǵy – oblys turǵyndary.
Biri – Oral qalasynyń 33 jastaǵy turǵyny. Koronavirýs juqtyrǵan adammen qarym-qatynasta bolǵandyqtan buǵan deiin karantindik statsionarǵa jatqyzylyp, zerthanalyq synama alynǵan.
Qalǵan bes adam – Reseide vahtalyq ádispen jumys isteitin oblys turǵyndary.
Reseidiń Saratov oblysymen shektesetin «Tasqala» avtoótkelindegi sanitarlyq-karantindik beketten ótken kezde olardyń ekeýinen dene qyzýynyń kóterilýi baiqalǵandyqtan, jedel járdem shaqyrylyp, provizorlyq statsionarǵa jatqyzylǵan. Qalǵan úsheýi karantindik statsionarǵa jetkizilgen bolatyn.
«Aýrý anyqtalǵan soń altaýy da oblystyq juqpaly aýrýlar aýrýhanasyna ornalastyryldy. Qazir jaǵdailary qanaǵattanarlyq. Naýqastarmen qarym-qatynasta bolǵandar meditsinalyq baqylaýǵa alynyp, aýrý oshaqtarynda dezinfektsiialyq jumystar júrgizildi», - delingen aqparatta.
Osylaisha BQO-da infektsiiaǵa shaldyqqandar sany 39-ǵa jetip, olardyń ekeýi jazylyp shyqty.
