Reseidiń Ekaterinbýrg qalasynyń mańynda jol apatynan 5 qazaqstandyq zardap shekti, dep habarlaidy QazAqparat QR SIM baspasóz qyzmetine silteme jasap.
«21 aqpanda Ekaterinbýrg qalasynyń janynda oryn alǵan jol apatynan Qazaqstannyń bes azamaty zardap shekti. Olar mingen Mercedes-Benz Sprinter shaǵyn avtobýs qar tazalaityn tehnikaǵa soǵylǵan. Kólik júrgizýshisi Qazaqstan azamaty. Qazan qalasyndaǵy Qazaqstannyń Bas konsýldyǵy jergilikti bilikpen shuǵyl bailanysqa shyǵyp, diplomattar Ekaterinbýrgtegi qazaq diasporasynyń ókilderimen birge zardap shekken otandastarymyzǵa barlyq qajetti kómek kórsetýde», - delingen habarlamada.
QR Qazandaǵy Bas konsýly Erkin Tuqymov jáne jergilikti qazaq diasporasy uiymynyń jetekshisi zardap shekken azamattarmen aýrýhanada kezdesti.
Bas konsýldyń Sverdlov oblysy Halyqaralyq jáne ekonomikalyq bailanystar jónindegi ministrimen kezdesýi barysynda bizdiń azamattarǵa barlyq meditsinalyq kómek kórsetýdi surady. Óńirdiń Densaýlyq saqtaý ministrligine tiisti tapsyrma berildi.
«Qazirgi ýaqytta úsh áiel aýrýhanada, olar óz esterin jiǵan jáne qalpyna keltirý terapiiasynan ótýde. Qalǵan eki áiel alǵan jaraqattarynyń aitarlyqtai emestigine bailanysty aýrýhanadan shyǵarylǵan. Kólik júrgizýshisi jaraqattardyń joqtyǵyna bailanysty aýrýhanaǵa barýdan bas tartty», - delingen habarlamada.
QR SIM baspasóz qyzmetiniń málimetinshe, atalǵan máseleni Qazaqstannyń Qazan qalasyndaǵy Bas konsýldyǵy baqylaýyna alǵan.
