Reseide internettiń reseilik segmentin ǵalamtordyń jahandyq infraqurylymynan ajyratqan jaǵdaida onyń turaqty jumysyn qamtamasyz etý jónindegi zań kúshine endi, dep habarlaidy TASS agenttigi
Resmi tulǵalar men sarapshylardyń aitýynsha, jańa zańnyń reseilik internetti paidalanýshylarǵa eshqandai áseri bolmaidy, Rýnet álemdik Internet keńistiginiń bir bóligi bolyp qala bermek.
«Zańnyń kúshine enýinen reseilik qoldanýshylar eshqandai ózgeristi baiqamaidy, bailanystyń sapasy da nasharlamaidy», - dep málimdedi RF Tsifrlyq damý, bailanys jáne buqaralyq kommýnikatsiialar ministrliginiń baspasóz hatshysy Evgenii Novikov.
Zańǵa sáikes, Rýnettiń qalypty jumys isteýine qaýip tóngen jaǵdaida Reseidiń Bailanys, aqparattyq tehnologiialar jáne buqaralyq kommýnikatsiialar salasyn qadaǵalaý jónindegi federaldyq qyzmeti (Roskomnadzor) jalpy kópshilik paidalanatyn bailanys jelisin óz baqylaýyna alady. Al ondai qaýiptiń týǵany, baqylaýdy federaldyq qyzmetke tapsyrý týraly úkimet sheshim qabyldaidy.
Zańnyń qabyldanýy jurtshylyq arasynda qyzý talqylandy. Tipti Qytaidyń «Altyn qalqany» siiaqty jabyq keńistik qurylady dep ýaiymdaǵandar da boldy.
Federaldyq qyzmettiń basshysy Aleksandr Jarovtyń málimdeýinshe, Reseide tek qana tyiym salynǵan nárseler buǵattalady, tyiym salynǵan aqparattarǵa ǵana shekteý qoiylady.
Al bailanys ministriniń orynbasary Aleksei Volin Qytaidyń ustanǵan joly Reseige týra kelmeitinin jetkizdi. Onyń aitýynsha, QHR ishki naryǵy Reseige qaraǵanda áldeqaida aýqymdy, sondyqtan ekonomikalyq turǵydan ózin qamtamasyz ete alady. Onyń ústine, Rýnetti paidalanýshylar 300 mln adamnan asady, iaǵni Resei halqynan eki ese kóp. Al Rýnetti oqshaýlap qoiý Rýnet naryǵyn kem degende eki ese qysqartýmen barabar.
