Resei úkimeti ishki ister organy qyzmetkerleriniń ókiletin keńeitetin zań jobasyn ázirledi. "Politsiia týraly" zańǵa túzetýler engizý týraly zań jobasynda politseilerdiń qarý qoldaný tártibin jeńildetý, qoǵamdyq shara ótetin oryndardy qorshaýǵa ruqsat berý, kólikterdi ashyp tekserý siiaqty máseleler qarastyrylǵan. Bul týraly ministrler kabineti maquldaǵan qujatqa silteme jasaǵan "Interfaks" agenttigi habarlady. Qujat ázirge memlekettik dýmaǵa jiberilmegen.
Zań jobasy politseilerge ustaý kezinde qaýip tóngen jaǵdaida qarý qoldanýǵa quqyq beredi. Buǵan qosa, joba avtorlary politsiiany kásibi mindetin atqarý kezindegi áreketi úshin jaýapkershilikten bosatýdy jón kórgen.
Buǵan deiin Reseide kólik politsiiasy ókilderine elektroshoker qoldanýǵa ruqsat beriledi dep habarlanǵan bolatyn.
Halyqaralyq "Agora" quqyq qorǵaý tobynyń dereginshe, Reseide qyzmettik ókiletin asyra paidalanǵany úshin sottalǵan tutqyndar azaiǵan. 2019 jyly "Azaptaý" babymen ishki ister organynyń 641 qyzmetkeri sottalǵan. Bul on jyl burynǵy kórsetkishpen salystyrǵanda 2,5 esege az.
2019 jyly jazda Máskeýde táýelsiz kandidattardy qalalyq dýma sailaýyna jibermegeni úshin oppozitsiia ruqsat etilmegen miting ótkizgen. Mitingiler kezinde myńnan astam adam ustaldy. Tergeý komiteti "politsei talaptaryna baǵynbaǵany úshin" dep birneshe qylmystyq is qozǵaǵan.
Birneshe adam sottaldy. Ustaý kezinde zardap shekken azamattar ózderin uryp-soqqan politseilerdiń áreketin tergeýdi talap etken, biraq olardyń ótinishteri oryndalmady.
