Resei óńirlerinde koronavirýs infektsiiasyna qarsy qaita vaktsinalaý, sonymen qatar COVID-19-ben aýyryp shyqqandarǵa ekpe salý bastaldy. Bul týraly RF Densaýlyq saqtaý ministrliginiń baspasóz qyzmeti jýrnalisterge sársenbi kúni málimdegen, dep habarlaidy "Ult aqparat" TASS agenttigine silteme jasap.
«Reseidiń Densaýlyq saqtaý ministrligi «COVID-19-ǵa qarsy eresekterdi vaktsinalaýdy júrgizý tártibi» ýaqytsha ádistemelik usynymdaryn bekitti. Óńirlerde revaktsinatsiia jáne aýyryp shyqqandarǵa ekpe salý bastaldy», - delingen habarlamada.
Usynymdarǵa sáikes, azamattar elde tirkelgen kez kelgen vaktsinalyq preparatty ektire alady. Degenmen birinshi dozany saldyrǵannan keiin naýqasta jaǵymsyz áserler paida bolsa, onyń qalaýymen, qarsylyqtar bolmaǵan jaǵdaida, vaktsinany almastyrýǵa múmkindik beriledi.
Atap ótilgendei, RF-da ujymdyq immýnitet kerekti deńgeide qalyptaspaiynsha, qaita vaktsinalaý nemese aýyryp shyqqannan keiin jarty jyl ótken soń ekpe salýǵa keńes beriledi. Bul kezeń «shuǵyl vaktsinalaý» dep atalady. Ujymdyq immýnitettiń maqsatty deńgeiine jetkennen keiin «qalypty vaktsinalaýǵa» kóshý júzege aspaq. Ol josparly túrde jazylyp shyqqannan nemese qaita vaktsinalaýdan keiin 12 ai óte egýdi kózdeidi.
