Reseidiń bailanys ministrligi bailanys operatorlary men vedomstvolarǵa Rýnetti oqshaýlaýǵa bailanysty jattyǵý ótkizý boiynsha nusqaýlyqtar jiberdi. Bailanys ministri Konstantin Noskovtyń qoly bar qujat Telegramda jariialandy. "Rostelekomnyń" baspasóz qyzmetiniń jetekshisi Andrei Poliakov bailanys ministrliginen nusqaýlyq alǵanyn rastady.
Bastapqyda Reseidi "turaqty, qaýipsiz ári minsiz jumys isteitin" internetpen qamtamasyz etýdi maqsat etetin jattyǵý 19 jeltoqsanda ótedi dep habarlanǵan edi. Biraq keiinirek onyń 23 jeltoqsanǵa belgilengeni aityldy.
Jattyǵý kezinde "abonenttik trafikke tosqaýyl jasaý jáne abonent jaily aqparat alýǵa tyrysý, bailanys qyzmetterin buǵattaý yqtimaldyǵy" tekserilmek.
Reseide "internetti oqshaýlaý" týraly zań 2019 jyly kóktemde qabyldanǵan. 1 qarashada kúshine engen. Buǵan deiin Reseidiń bilik ókilderi qujat búkilálemdik internet ajyrap qalǵan jaǵdaida Resei internetiniń turaqty jumys isteýin qamtamasyz etedi dep aitqan. Onyń atqarylý barysyn Roskomnadzor qadaǵalaidy, al operator jelilerinde qorǵaý quraldaryn ornatý men paidalaný tártibin Resei úkimeti bekitedi dep aitylǵan. Zańǵa qarsy azamattar "avtonomdy jeli" internette jappai tsenzýranyń paida bolýyna yqpal etýi múmkin dep qaýiptenedi.
