Norilsk baiytý fabrikasynyń aýmaǵyndaǵy tsehta ýatýshy galereia opyrylyp, birneshe adam qaza tapty, dep habarlaidy TASS agenttigi.
«20 aqpanda Máskeý ýaqytymen saǵat 00:44 shamasynda ýatýshy tsehtyń galereiasy qulaǵany týraly habar kelip tústi. Úiindi astynan tórt adamdy shyǵaryp aldyq. Onyń bireýi aýrýhanada kóz jumdy» dep habarlady Reseidiń tótenshe jaǵdailar ministrligi.
Oqiǵa bolǵan kezde ǵimaratta 8 adam jumys istep jatqan.
Vedomstvonyń málimetinshe, eki adam óz betinshe qaýipsiz jerge shyǵyp úlgergen. Sosyn qutqarýshylar úiindi astynan taǵy tórt adamdy alyp shyqty.
Jaraqat alǵandar tez arada dárigerlerge tapsyrylǵan. Onyń biri aýrýhanada qaitys boldy.
«Taǵy eki adamdy izdep jatyrmyz» dep habarlady TJM baspasóz qyzmeti.
Qutqarý jumysyna 181 adam jáne 56 tehnika jumyldyrylǵan.
Aqparat kóziniń aitýynsha, úiindini aqtaryp, adamdardy izdeýge óńirdegi qatty aiaz jáne konstrýktsiialardyń qulaý qaýpi kedergi jasap tur.
Taǵy bir aqparat kózine sensek, fabrikada bir emes, úsh galereia jáne ýatý ortalyǵynyń qoimasy ishinara opyrylǵan.
Qulaǵan aýmaq - shamamen 200 sharshy metr.
Aimaq prokýratýrasy oqiǵa ornynda ónerkásip qaýipsizdigi tehnikasynyń qanshalyqty saqtalǵanyn tekseredi.
