Reseide sońǵy bir kúnde 71 adamnan koronavirýs tabyldy. Bul týraly premer-ministr Mihail Mishýstin habarlady. Elde virýs juqqandar sany 438 adam boldy.
Koronavirýs jaǵdaiyn baqylaý jónindegi shuǵyl shtabynyń dereginshe, dertke jańadan shaldyqqandardyń barlyǵy Máskeýden anyqtalǵan.
Mishýstin naýqastarmen bailanysta bolǵandardy anyqtaýdyń yńǵaily júiesin qalyptastyrýdy tapsyrdy. Premer-ministrdiń pikirinshe, uialy bailanys operatorlarynyń deregin osy maqsatta paidalanýǵa bolady.
Ol sonymen birge egde adamdardy úiden shyqpaýǵa shaqyrdy.
Máskeý meri Sergei Sobianin 26 naýryz ben 14 sáýir aralyǵynda 65 jastan asqan qala turǵyndary men sozylmaly aýrýǵa shaldyqqan adamdar úide otyrýy tiis dep aitty. Merdiń resmi saitynda osy týraly arnaiy jarlyq mátini de jariialandy.
Oǵan sáikes, jumys berýshiler qyzmetkerlerin qashyqtan jumys isteýge kóshirýi tiis nemese tólenetin demalysqa jiberýi kerek. Tek óte mańyzdy kásiporyn men mekemeler, densaýlyq saqtaý salasy qyzmetkerleri ǵana jumysyn jalǵasa beredi.
Úide karantinde otyrǵandarǵa 4 myń rýbl (shamamen 50 dollar nemese 22 myń teńge) kóleminde bir rettik kómek beriledi. Jartysy karantinniń basynda, jartysy aiaǵynda tólenedi. Kommýnaldyq tólemderdi keshiktirgen turǵyndardyń tólemine ósimaqy qosylmaidy.
23 naýryzdan bastap Resei koronavirýsqa bailanysty Túrkiia, Tailandqa qatynaityn ushaq reisterin azaitqan. Qazir bul elderge tek Máskeýden ǵana ushýǵa bolady. Buǵan deiin "Aeroflot" áýe kompaniiasy Eýropanyń birqatar eline reisterdi shektegen.
Álemde Covid-19 koronavirýsy 336 myńnan astam adamǵa juqty. Qaza bolǵandar sany 14 myńnan asyp ketti. Virýs 180-nen astam elge tarady. 98 myńnan astam adam dertten aiyqqan.
