Qazaqstannan Reseidiń Ekaterinbýrg qalasyna bara jatqan avtobýs jolda aýdaryldy. Apat Astana ýaqytymen tańǵy toǵyzda Ekaterinbýrg — Shadrinsk — Kýrgan jolynyń 60-shy kilometrinde boldy, dep habarlaidy Sputnik RIA Novosti agenttigine silteme jasap.
"Bastapqy derekter boiynsha, avtobýs júrgizýshisi Qazaqstan – Ekaterinbýrg baǵdarymen kele jatyp (salonda 17 adam bolǵan), rólge ie bola almai, jyraǵa túsip ketken. Avtobýs bir qyryna aýdarylyp qaldy", — delingen habarlamada.
Apat kezinde 1985 jyly týǵan jolaýshy zardap shekti. Miy shaiqalyp, basy men qoly jaralanǵan áieldi Sverdlov oblysy Beloiarsk aýylyndaǵy aýrýhanaǵa jetkizgen.
Esterińizge sala ketsek, 17 qarashada Saratovtan Ýlianovsk qalasyna bara jatqan avtobýs temirjol ótkelinde poiyzben soqtyǵysyp qaldy. Saldarynan avtobýsta bolǵan bes ózbek azamaty ajal qushqan. Eki qazaqstandyq – júrgizýshi men ony almastyrýshy aýrýhanaǵa tústi. Keiinirek júrgizýshige qatysty qylmystyq is qozǵaldy.
«Osydan eki kún buryn qazaqstandyq avtobýs Resei Federatsiiasynyń Saratov oblysynda temirjol poiyzymen soqtyǵysyp, saldarynan bes adam qaza tapty. Avtobýstyń ishinde jeti jolaýshy bolǵan. Onyń beseýi kóz jumdy. Qaza tapqandardyń barlyǵy Ózbekstan azamaty. Júrgizýshi jáne onyń kómekshisi Qazaqstan azamattary. Olar tiri. Biraq, jaǵdailary óte aýyr, jansaqtaý bóliminde jatyr. Týystary sol jaqta. Habar berildi. Tergeý júrgizilip jatyr. Bizdiń Astrahandaǵy konsýl bul máseleni erekshe baqylaýyna alyp, kúndelikti jumysyn júrgizip jatyr», - dedi osy oqiǵaǵa qatysty pikir bildirgen QR SIM resmi ókili Aibek Smadiiarov.
