Resei premer-ministri Mihail Mishýstin COVID-19 aýrýyna shaldyqqanyn habarlady. Úkimet jetekshisiniń mindetin ýaqytsha birinshi vitse-premer Andrei Beloýsov atqarady.
«Koronavirýsqa tapsyrǵan test meniń naýqas ekenimdi kórsetkeni jańa ǵana málim boldy», - dedi ol RF Prezidenti Vladimir Pýtinmen videobailanys barysynda.
Memlekettik "Rossiia-24" arnasynyń efiri kezinde premer-ministr úkimet múshelerimen bailanysta bolatynyn aitty. Ol reseilikterdi shekteý sharalaryna nemquraily qaramaýǵa shaqyrdy.
Sońǵy bir kúnde Reseide 7 myńnan astam adamnan koronavirýs tabylǵan. 101 adam qaitys bolǵan. Virýs juqtyrǵandar jalpy 106 498 adamǵa jetti. 1 073-i qaitys bolǵan, 11 619 jazylǵan.
Virýs juqtyrǵandar sany boiynsha Resei astanasy Máskeý alda tur: munda bir kún ishinde 3093 adamnan koronavirýs tabylǵan.
Biliktiń aitýynsha, mamyr aiynyń basynda epidemiia sharyqtaý shegine jetedi. Prezident Vladimir Pýtin jaqynda jumyssyz apta merzimin 11 mamyrǵa deiin uzartqan. Máskeýde "oqshaýlaý rejimi" 12 mamyrǵa deiin kúshinde bolady.
Buǵan deiin Pýtin úkimetke 12 mamyrǵa deiin shekteý sharalaryn birtindep azaitý josparyn jasaýdy tapsyrǵan.
