رەسەي پرەمەر-مينيسترٸ ميحايل ميشۋستين COVID-19 اۋرۋىنا شالدىققانىن حابارلادى. ٷكٸمەت جەتەكشٸسٸنٸڭ مٸندەتٸن ۋاقىتشا بٸرٸنشٸ ۆيتسە-پرەمەر اندرەي بەلوۋسوۆ اتقارادى.
«كوروناۆيرۋسقا تاپسىرعان تەست مەنٸڭ ناۋقاس ەكەنٸمدٸ كٶرسەتكەنٸ جاڭا عانا مەلٸم بولدى», - دەدٸ ول رف پرەزيدەنتٸ ۆلاديمير پۋتينمەن ۆيدەوبايلانىس بارىسىندا.
مەملەكەتتٸك "روسسييا-24" ارناسىنىڭ ەفيرٸ كەزٸندە پرەمەر-مينيستر ٷكٸمەت مٷشەلەرٸمەن بايلانىستا بولاتىنىن ايتتى. ول رەسەيلٸكتەردٸ شەكتەۋ شارالارىنا نەمقۇرايلى قاراماۋعا شاقىردى.
سوڭعى بٸر كٷندە رەسەيدە 7 مىڭنان استام ادامنان كوروناۆيرۋس تابىلعان. 101 ادام قايتىس بولعان. ۆيرۋس جۇقتىرعاندار جالپى 106 498 ادامعا جەتتٸ. 1 073-ٸ قايتىس بولعان, 11 619 جازىلعان.
ۆيرۋس جۇقتىرعاندار سانى بويىنشا رەسەي استاناسى مەسكەۋ الدا تۇر: مۇندا بٸر كٷن ٸشٸندە 3093 ادامنان كوروناۆيرۋس تابىلعان.
بيلٸكتٸڭ ايتۋىنشا, مامىر ايىنىڭ باسىندا ەپيدەمييا شارىقتاۋ شەگٸنە جەتەدٸ. پرەزيدەنت ۆلاديمير پۋتين جاقىندا جۇمىسسىز اپتا مەرزٸمٸن 11 مامىرعا دەيٸن ۇزارتقان. مەسكەۋدە "وقشاۋلاۋ رەجيمٸ" 12 مامىرعا دەيٸن كٷشٸندە بولادى.
بۇعان دەيٸن پۋتين ٷكٸمەتكە 12 مامىرعا دەيٸن شەكتەۋ شارالارىن بٸرتٸندەپ ازايتۋ جوسپارىن جاساۋدى تاپسىرعان.
