Sýret: korrespondent.net
Resei áskeri 16 aqpanǵa qaraǵan túni Ýkrainaǵa zymyranmen jappai shabýyl jasady, dep jazady Azattyq radiosy.
Ýkraina áskeri-áýe kúshteriniń habarlaýynsha, Resei ushaqtary men kemeleri 32 qanatty zymyran jibergen, onyń 14-i atyp túsirilgen.
"H-22 qanatty zymyrandarynyń bir bóligi nysanaǵa jetip, mańyzdy infraqurylym nysandaryn qiratty. Qazir raketanyń bul túrin joia alatyn qarý joq" dep jazylǵan habarlamada.
"Soqqy saldarynan Dnepropetrovsk oblysynyń Pavlograd qalasynda 79 jastaǵy áiel qaza boldy" dep málimdedi jergilikti bilik. Jeti adam jaralanǵan, ekeýi aýrýhanaǵa jatqyzylǵan. Birneshe turǵyn úi qiraǵan, ónerkásip orny búlingen.
"Pavlogradta túnde sumdyq boldy. Túngi saǵat 3-te jurt shyrt uiqyda jatqan shaqta jaý zymyranmen qalaǵa soqqy jasady" delingen Dnepropetrovsk oblysy ákimshiliginiń jetekshisi Sergei Lysaktyń habarlamasynda.
Sonymen qatar Poltava, Lvov jáne Kirovograd oblysyna soqqy jasalǵany da habarlandy. Lvov oblysynyń biligi infraqurylym nysandary qiraǵanyn rastap otyr.
Ýkraina prezidenti keńsesiniń jetekshisi Andrei Ermak Resei barlaý júrgizip, jalǵan nysanalardy paidalanyp, raketa shabýylyn jasaý taktikasyn ózgertip jatyr dedi.
Resei qorǵanys ministrligi oqiǵaǵa túsinikteme bergen joq.
Buǵan deiin Ýkrainaǵa iri raketa shabýyly 10 aqpanda jasalǵan. Sol kezde Ýkraina qarýly kúshteri Resei áskeri bir kúnde 106 raketa jaýdyrdy dep málimdegen.
Máskeý taǵaiyndaǵan gýbernator 16 aqpanda Resei anneksiialap alǵan Sevastopolde birneshe ýkrain drony atyp túsirilgenin aitty. Ýkrain jaǵy da aqparatqa túsinikteme bermedi.
