Resei sońǵy júz jylda alǵash ret syrtqy qaryzy boiynsha defoltqa ushyrady, dep habarlaidy QazAqparat BBC News-ke silteme jasap.
27 mamyrda 100 million dollar kóleminde protsent tólemi tólenýi kerek edi. Resei tarapy aqsha Belgiianyń «Euroclear» qarjy qyzmetteri kompaniiasyna jiberildi dep málimdedi. Sodan keiin ol tólem investorlar arasynda bólinýi tiis bolatyn.
Bul tólem buǵattalyp, kreditorlar dividendterin almaǵan. Aqsha tólem jasalǵan kúnnen bastap 30 kún ishinde túsýi kerek edi, sondyqtan bul defolt dep sanalady. «Euroclear» barlyq sanktsiialardy ustanatynyn atap ótti.
Resei úkimeti óz tólemderin ýaqytynda jasaǵysy keletinin málimdedi. 40 mlrd dollarǵa jýyq resei qaryzy dollarmen nemese eýromen belgilengen, onyń jartysy elden tysqary jerde.
Óz kezeginde Kreml 23 maýsymda qaryz boiynsha barlyq tólemder shartta dollarmen nemese basqa da halyqaralyq valiýtamen kórsetilse de, Resei banki arqyly rýblmen júrgiziletini týraly buiryq shyǵarǵan.
Bul defolt - Resei úshin qaǵaz júzindegi soqqy. Defolt jariialaǵan elderge ádette qaryz berilmeidi, degenmen Reseige sanktsiialarǵa bailanysty batys naryǵynda onsyz da qaryz berýge tyiym salynǵan.
Resei sońǵy ret syrtqy qaryzy boiynsha defoltty 1918 jyly jariialady. Ol kezde kommýnisterdiń kóshbasshysy Lenin bolshevikter revoliýtsiiasy kezinde Resei imperiiasynyń qaryzyn tóleýden bas tartqan bolatyn.
