Resei sportshylary 2022 jyldyń 16 jeltoqsanyna deiin, eki jyl boiy eldiń ulttyq týymen jarysqa qatysa almaidy. Dúniejúzi jáne Resei antidoping agenttikteriniń arasyndaǵy daýǵa bailanysty sporttaǵy arbitraj soty osyndai sheshim shyǵardy. Dúniejúzilik antidoping agenttigi – WADA Resei sportshylaryn tórt jyl boiy iri halyqaralyq jarystarǵa qatystyrmaýdy suraǵan.
Buǵan qosa, Resei eki jyl boiy halyqaralyq sport jarystaryn, olimpiadalar ótkize almaidy. Bul shekteýdiń qurlyqtyq dodalarǵa qatysy joq. Máselen, 2021 jyly jazda Reseide Eýro, al 2022 jyly Chempiondar ligasy ótkiziledi.
Onyń ústine, Reseidiń dopingke qarsy agenttigi WADA-ǵa 2019 jylǵy qańtardan sot sheshimi shyqqanǵa deiingi aralyqtaǵy shyǵyndarynyń ótemi úshin 1 million dollardan astam aqsha tóleýi kerek.
- 2019 jyly 9 jeltoqsanda WADA-nyń atqarýshy komiteti Reseidi tórt jyl halyqaralyq jarystarǵa, sonyń ishinde olimpiadalar men álem chempionattaryna qatysý quqyǵynan aiyrǵan. Al doping tekserýi durys shyqqan reseilik sportshylar beitarap statýspen dodaǵa qatysa alady. Halyqaralyq resmi sport sharalarynda Resei ánuranyn oinatyp, týyn kóterýge tyiym salynady.
- 2019 jylǵy 27 jeltoqsanda Reseidiń dopingke qarsy agenttigi el sportshylaryn halyqaralyq jarystarǵa tórt jyl qatystyrmaý týraly sheshimine qarsylyq bildirip, WADA-ǵa hat jibergen.
- Qańtarda WADA Reseidegi doping máselesine bailanysty Lozannadaǵy Halyqaralyq sporttaǵy arbitraj sotyna qaiyrylǵan.
- Resei sportyndaǵy doping daýy birneshe jyldan beri jalǵasyp keledi. Resei biligi memlekettik deńgeide doping baǵdarlamasy bar degen pikirdi joqqa shyǵarady.
