Máskeýdiń Tagansk aýdandyq soty 13 sáýir kúni Resei aýmaǵynda Telegram messendjerin buǵattaý týraly sheshim shyǵardy, - dep habarlaidy Azattyqtyń Orys redaktsiiasynyń tilshisi. Sot sheshimi boiynsha, Telegram qyzmeti kompaniia "Federaldyq qaýipsizdik qyzmetiniń aqparatty shifrlaý kiltin berý talabyn oryndaǵanǵa deiin" shektelmek.
Sot sheshimi dereý oryndalýy tiis. Kompaniia sot sheshimine bir ai ishinde shaǵymdana alady. Messendjerdi buǵattaý týraly shaǵymdy sotqa Roskomnadzor mekemesi túsirgen.
Roskomnadzor Telegram-da "terrorlyq uiymdar qoldanatyn málimetter bolýy múmkin" dep, messendjer qyzmetin dereý shekteýdi talap etken.
Sotqa Telegram ókilderi qatysqan joq. Shaǵym birneshe minýt qana qaraldy. Keshe messendjerdi oilap tapqan Pavel Dýrov advokattaryna sotqa qatysýǵa tyiym salǵan. Biraq advokattar sot otyrysyn keiinge qaldyrýdy suraǵan, búgin sot ol talap-aryzdy qabyldamai tastady.
Munyń aldynda atalǵan mekeme Telegram messendjerin FSB-niń suraýymen buǵattaý týraly sotqa shaǵymdanǵan. Buǵan qosa mekeme messendjer qoldanýshylary qaldyrǵan jazbalardyń qupiia kiltin FSB-ge tapsyrýdy talap etken. Ótken aptada messendjar basshylyǵyna berilgen ýaqyt aiaqtaldy.
Telegram FSB-ge qoldanýshylar jazbalarynyń qupiia kiltin berý tehnikalyq turǵyda múmkin emesin aityp, talapty oryndaýdan bas tartyp otyr.
