مەسكەۋدٸڭ تاگانسك اۋداندىق سوتى 13 سەۋٸر كٷنٸ رەسەي اۋماعىندا Telegram مەسسەندجەرٸن بۇعاتتاۋ تۋرالى شەشٸم شىعاردى, - دەپ حابارلايدى ازاتتىقتىڭ ورىس رەداكتسيياسىنىڭ تٸلشٸسٸ. سوت شەشٸمٸ بويىنشا, Telegram قىزمەتٸ كومپانييا "فەدەرالدىق قاۋٸپسٸزدٸك قىزمەتٸنٸڭ اقپاراتتى شيفرلاۋ كٸلتٸن بەرۋ تالابىن ورىنداعانعا دەيٸن" شەكتەلمەك.
سوت شەشٸمٸ دەرەۋ ورىندالۋى تيٸس. كومپانييا سوت شەشٸمٸنە بٸر اي ٸشٸندە شاعىمدانا الادى. مەسسەندجەردٸ بۇعاتتاۋ تۋرالى شاعىمدى سوتقا روسكومنادزور مەكەمەسٸ تٷسٸرگەن.
روسكومنادزور Telegram-دا "تەررورلىق ۇيىمدار قولداناتىن مەلٸمەتتەر بولۋى مٷمكٸن" دەپ, مەسسەندجەر قىزمەتٸن دەرەۋ شەكتەۋدٸ تالاپ ەتكەن.
سوتقا Telegram ٶكٸلدەرٸ قاتىسقان جوق. شاعىم بٸرنەشە مينۋت قانا قارالدى. كەشە مەسسەندجەردٸ ويلاپ تاپقان پاۆەل دۋروۆ ادۆوكاتتارىنا سوتقا قاتىسۋعا تىيىم سالعان. بٸراق ادۆوكاتتار سوت وتىرىسىن كەيٸنگە قالدىرۋدى سۇراعان, بٷگٸن سوت ول تالاپ-ارىزدى قابىلداماي تاستادى.
مۇنىڭ الدىندا اتالعان مەكەمە Telegram مەسسەندجەرٸن فسب-نٸڭ سۇراۋىمەن بۇعاتتاۋ تۋرالى سوتقا شاعىمدانعان. بۇعان قوسا مەكەمە مەسسەندجەر قولدانۋشىلارى قالدىرعان جازبالاردىڭ قۇپييا كٸلتٸن فسب-گە تاپسىرۋدى تالاپ ەتكەن. ٶتكەن اپتادا مەسسەندجار باسشىلىعىنا بەرٸلگەن ۋاقىت اياقتالدى.
Telegram فسب-گە قولدانۋشىلار جازبالارىنىڭ قۇپييا كٸلتٸن بەرۋ تەحنيكالىق تۇرعىدا مٷمكٸن ەمەسٸن ايتىپ, تالاپتى ورىنداۋدان باس تارتىپ وتىر.
