Resei soty Qazaqstan azamaty, Vladimir Pýtinge Resei premer-ministri bolyp turǵanda qastandyq jasamaq boldy degen aiyppen sottalǵan Ilia Pianzindi shartty túrde merziminen buryn bosatýdan bas tartty. Bul týraly Samara oblystyq prokýratýrasyna silteme jasaǵan reseilik "Kommersant" gazeti habarlady. Pianzin jazasyn Samara oblysyndaǵy qatań rejimdegi túrmede ótep jatyr.
Pianzinniń ózin shartty túrde merziminen buryn bosatý týraly ótinishin Samar oblysynyń Volga aýdandyq soty qarady. Prokýratýranyń aqparatynsha, sot Pianzindi "túrme qyzmetkeriniń talabyn oryndamaǵany úshin" bosatýdan bas tartty.
Máskeý soty 2013 jyly kúzde 33 jastaǵy Pianzindi 2011 jyly Vladimir Pýtinge qastandyq jasaýǵa daiyndaldy dep aiyptap, 10 jylǵa sottaǵan. 2017 jyly shildede Pianzin Resei prezidenti Vladimir Pýtinnen ózine raqymshylyq jasaýdy suraǵan.
Pianzin 2012 jyly aqpanda Ýkrainada sheshenstandyq Adam Osmaevpen birge olar turyp jatqan páterde qoldan jasalǵan jarylǵysh qurylǵy jarylyp, jandarynda bolǵan taǵy bir Sheshenstan azamaty Rýslan Madaev qaza tapqan kezde ustalǵan. Pianzin men Osmaev Pýtinge qastandyq jasaýǵa daiyndalǵanyn moiyndaǵan. Keiin ekeýi de tergeýde ózderine qysym jasalǵanyn málimdep, jaýaptarynan bas tartqan.
Tergeý boljamynsha, Pianzin 2011 jyly jeltoqsanda Ýkraina territoriiasynda bolǵanynda Resei prezidenttigine kandidat Vladimir Pýtinge qastandyq jasaýdy josparlaǵan topqa qosylǵan. Top Máskeýde Pýtinniń korteji júretin jolda minalanǵan kólik jarýdy josparlaǵan.
