Foto: pixabay.com
Separatizm jáne ulttar arasynda alaýyzdyq týdyrý kúdigi boiynsha aiyptalǵan Oral qalasynyń turǵyny M.V. Iakovchenkony Reseiden elimizge qaitarý máselesi qaralyp jatyr, dep habarlaidy QazAqparat agenttigi Bas prokýratýranyń baspasóz qyzmetine silteme jasap.
«BQO-nyń Oral qalasynda turǵan M.V. Iakovchenko «VKontakte» áleýmettik jelisinde jariialanǵan «Oral – joiylyp bara jatqan aýmaq» postyna Qazaqstan Respýblikasynyń birkelkiligi men tutastyǵyn buzýdy, sondai-aq azamattardy ulttyq belgisi boiynsha kemsitýdi nasihattaý belgileri bar pikir jazǵany úshin ulttyq alaýyzdyq týdyrý jáne separatizm boiynsha kúdikke ilinip otyr», - delingen resmi habarlamada.
M.Iakovchenko Reseige qashyp, kórshi el biliginen pana suraǵan. RF onyń ótinishin qanaǵattandyryp, 1 jyl merzimge pana bergen. Bul merzim biyl 19 qazanda aiaqtalady. Qazaqstannyń Bas prokýratýrasy osy merzim aiaqtalǵan kezde kúdiktini elge qaitarýdy surap otyr.
Vedomstvonyń atalǵan is boiynsha qolǵa alǵan is-áreketin usynamyz:
08.09.2022 jyly kúdiktiniń áreketteri QR Qylmystyq kodeksi 174-babynyń 1-bóligimen (ulttyq alaýyzdyq týdyrdy), 180-babynyń 2-bóligimen (separatizm) saralanǵan.
21.09.2022 jyly BQO prokýratýrasy M.V. Iakovchenkoǵa taǵylǵan aiyp boiynsha qylmystyq isti qaraý úshin Oral qalalyq sotyna jiberdi.
11.10.2022 jyly Iakovchenkonyń kelmeýine bailanysty sot ony májbúrlep alyp kelý týraly qaýly shyǵardy. Ony oryndaý barysynda Iakovchenko 21.09.2022 jyly «Syrym» ótkizý pýnktinde Reseimen memlekettik shekarany kesip ótkeni anyqtaldy.
14.10.2022 jyly sot bultartpaý sharasyn «kúzetpen ustaýǵa» ózgertip, kúdiktige izdeý jariialandy.
01.12.2022 jyly M.V Iakovchenko Resei Federatsiiasynyń Rostov oblysynda ustaldy. Biraq ol 1 jyl merzimge (19.10.2023 jylǵa deiin) ýaqytsha pana berilýine bailanysty, bosatyldy.
28.02.2023 jyly QR Bas prokýratýrasy qaralyp jatqan qylmystyq is aiasynda jaýapkershilikke tartý úshin Iakovchenkony berý týraly Resei Federatsiiasynyń Bas prokýratýrasyna suraý joldady.
17.07.2023 jyly telefon arqyly sóilesý barysynda Resei Federatsiiasynyń Bas prokýratasynyń oryndaýshysy suraýdyń qaraýǵa alynǵanyn rastady.
Eske sala keteiik, ótken jyly 4 mamyrda áleýmettik jelide arandatýshylyq pikir jazǵan Oral turǵynyna qatysty is qozǵalǵan edi.
