Reseidiń tórt oligarhy — Álisher Ýsmanov, Roman Abramovich, Mihail Fridman jáne Petr Aven — Eýropa odaǵy salǵan sanktsiiany alyp tastaýdy surap, Eýropa sotyna aryzdandy.
Bul jóninde habar taratqan Wall Street Journal árbir oligarhtyń jeke-jeke aryz túsirgenin atap ótken, dep jazady Azattyq.
The Wall Street Journal Álisher Ýsmanov aryzynyń sotta tezirek qaralǵanyn qalaitynyn aitady. Ýsmanov muny óz kompaniiasynyń sanktsiiaǵa bailanysty birneshe kelisimsharty úzilgenin, sonyń nátijesinde bankrot aldynda turǵanymen túsindirgen. Biraq ótken aida sot Ýsmanovtyń ótinishin qanaǵattandyrmaǵan.
Ulybritaniia syrtqy ister ministrliginiń málimetine qaraǵanda, naýryz aiynda Álisher Ýsmanov sanktsiia tizimine ilingen soń birqatar aktivterin qaryndasy Gúlbahor Ismailovanyń atyna aýdarǵan.
Ismailovanyń Ulybritaniiadaǵy barlyq aktivi buǵattalyp, óziniń bul elge kirýine tyiym salǵan. Tashkenttegi Fedorovich klinikalyq sanatoriiiniń 82,1 paiyzy Gúlbahor Ismailovaǵa tiesili sanalady.
8 sáýirde Eýropa odaǵynyń keńesi Álisher Ýsmanovtyń taǵy bir qaryndasy Saodat Narzievany sanktsiia tizimine qosqan. Jemqorlyq pen uiymdasqan qylmysty zertteý ortalyǵy (OCCRP) Narzievanyń Shveitsariia bankinde jalpy somasy eki milliard dollardan asatyn 27 shoty bar ekenin jazǵan.
Álisher Ýsmanov Resei Ýkrainaǵa basyp kirgen soń Pýtinniń ainalasyndaǵy oligarhtardyń biri retinde Eýropa odaǵynyń sanktsiiasyna ilingen.
Bul sanktsiia boiynsha Álisher Ýsmanov Eýropa odaǵyna kire almaidy, al aktivteri buǵattalǵan. Naýryzdyń basynda Frantsiia biligi Álishev Ýsmanovqa qatysy bar eki tikushaqty tartyp alǵan. Germaniia da Álisher Ýsmanovqa tiesili, quny 600 million dollar turatyn Dilbar iahtasyn alyp qoiǵany habarlanǵan. Italiia basylymy Álisher Ýsmanovtyń Sardiniiadaǵy villasynyń esigine mór basylǵanyn jazǵan.
Ulybritaniiada turatyn Fridman men Aven - Resei Alfa bankiniń negizin salýshylar. Olar Eýropa sotyna shaǵym túsiretinin naýryz aiynda habarlaǵan.
Portýgaliia azamattyǵyn alǵan Roman Abramovich sanktsiia óziniń Eýropa odaǵy azamaty retindegi quqyǵyn buzyp otyr dep sanaidy. Resei oligarhtarynyń aryzy boiynsha sot protsesteri qashan bastalary belgisiz.
