رەسەيدٸڭ تٶرت وليگارحى — ەلٸشەر ۋسمانوۆ, رومان ابراموۆيچ, ميحايل فريدمان جەنە پەتر اۆەن — ەۋروپا وداعى سالعان سانكتسييانى الىپ تاستاۋدى سۇراپ, ەۋروپا سوتىنا ارىزداندى.
بۇل جٶنٸندە حابار تاراتقان Wall Street Journal ەربٸر وليگارحتىڭ جەكە-جەكە ارىز تٷسٸرگەنٸن اتاپ ٶتكەن, دەپ جازادى ازاتتىق.
The Wall Street Journal ەلٸشەر ۋسمانوۆ ارىزىنىڭ سوتتا تەزٸرەك قارالعانىن قالايتىنىن ايتادى. ۋسمانوۆ مۇنى ٶز كومپانيياسىنىڭ سانكتسيياعا بايلانىستى بٸرنەشە كەلٸسٸمشارتى ٷزٸلگەنٸن, سونىڭ نەتيجەسٸندە بانكروت الدىندا تۇرعانىمەن تٷسٸندٸرگەن. بٸراق ٶتكەن ايدا سوت ۋسمانوۆتىڭ ٶتٸنٸشٸن قاناعاتتاندىرماعان.
ۇلىبريتانييا سىرتقى ٸستەر مينيسترلٸگٸنٸڭ مەلٸمەتٸنە قاراعاندا, ناۋرىز ايىندا ەلٸشەر ۋسمانوۆ سانكتسييا تٸزٸمٸنە ٸلٸنگەن سوڭ بٸرقاتار اكتيۆتەرٸن قارىنداسى گٷلباحور يسمايلوۆانىڭ اتىنا اۋدارعان.
يسمايلوۆانىڭ ۇلىبريتانيياداعى بارلىق اكتيۆٸ بۇعاتتالىپ, ٶزٸنٸڭ بۇل ەلگە كٸرۋٸنە تىيىم سالعان. تاشكەنتتەگٸ فەدوروۆيچ كلينيكالىق ساناتورييٸنٸڭ 82,1 پايىزى گٷلباحور يسمايلوۆاعا تيەسٸلٸ سانالادى.
8 سەۋٸردە ەۋروپا وداعىنىڭ كەڭەسٸ ەلٸشەر ۋسمانوۆتىڭ تاعى بٸر قارىنداسى ساودات نارزيەۆانى سانكتسييا تٸزٸمٸنە قوسقان. جەمقورلىق پەن ۇيىمداسقان قىلمىستى زەرتتەۋ ورتالىعى (OCCRP) نارزيەۆانىڭ شۆەيتسارييا بانكٸندە جالپى سوماسى ەكٸ ميلليارد دوللاردان اساتىن 27 شوتى بار ەكەنٸن جازعان.
ەلٸشەر ۋسمانوۆ رەسەي ۋكرايناعا باسىپ كٸرگەن سوڭ پۋتيننٸڭ اينالاسىنداعى وليگارحتاردىڭ بٸرٸ رەتٸندە ەۋروپا وداعىنىڭ سانكتسيياسىنا ٸلٸنگەن.
بۇل سانكتسييا بويىنشا ەلٸشەر ۋسمانوۆ ەۋروپا وداعىنا كٸرە المايدى, ال اكتيۆتەرٸ بۇعاتتالعان. ناۋرىزدىڭ باسىندا فرانتسييا بيلٸگٸ ەلٸشەۆ ۋسمانوۆقا قاتىسى بار ەكٸ تٸكۇشاقتى تارتىپ العان. گەرمانييا دا ەلٸشەر ۋسمانوۆقا تيەسٸلٸ, قۇنى 600 ميلليون دوللار تۇراتىن Dilbar ياحتاسىن الىپ قويعانى حابارلانعان. يتالييا باسىلىمى ەلٸشەر ۋسمانوۆتىڭ ساردينيياداعى ۆيللاسىنىڭ ەسٸگٸنە مٶر باسىلعانىن جازعان.
ۇلىبريتانييادا تۇراتىن فريدمان مەن اۆەن - رەسەي الفا بانكٸنٸڭ نەگٸزٸن سالۋشىلار. ولار ەۋروپا سوتىنا شاعىم تٷسٸرەتٸنٸن ناۋرىز ايىندا حابارلاعان.
پورتۋگالييا ازاماتتىعىن العان رومان ابراموۆيچ سانكتسييا ٶزٸنٸڭ ەۋروپا وداعى ازاماتى رەتٸندەگٸ قۇقىعىن بۇزىپ وتىر دەپ سانايدى. رەسەي وليگارحتارىنىڭ ارىزى بويىنشا سوت پروتسەستەرٸ قاشان باستالارى بەلگٸسٸز.
