QR Aqparat jáne qoǵamdyq damý ministri Dáýren Abaev Memleket basshysy Qasym-Jomart Toqaevtyń «Nemetskaia volna» teleradiokompaniiasyna bergen suhbatyna pikir bildirdi, dep habarlaidy QazAqparat.
«Resei men Ýkraina shielenisi Qazaqstanǵa barlyq jaǵynan tiimsiz. Eki halyq ta bizge teń dárejede jaqyn. Reseilikter men ýkrainalyqtar da óz arasynda baýyrlas, ony ózderi de biledi. Sondyqtan biz shielenisterdiń tezirek jáne beibit sheshilýine múddelimiz», - dedi ministr «Habar» arnasyndaǵy «Ashyq dialog» baǵdarlamasynda.
Onyń aitýynsha, soǵys maidanda emes, adamdardyń oi-sanasynda júrip jatyr.
«Ne bizben birgesiń, ne jaýsyń» degen ustanym beleń aldy. Al, keleshek kelissózderge ziian keltirmeýdi kózdeitin kez kelgen ustanym berý áreketi teris qabyldanýda. Negizinde biz sóz ben intonatsiialardyń tutqynyna ainaldyq. Bizdiń Prezident naǵyz diplomat retinde anneksiianyń tym aýyr tujyrymdama ekenin aitty. Ol eshkimdi aiyptaǵan joq, eshkimdi qoldaǵan joq. Qasym-Jomart Kemeluly mundai sózderdiń baǵasyn túsinip, úzildi-kesildi eshteńe aitqan joq», - dedi D. Abaev.
Sonymen birge, D. Abaev QR Tuńǵysh Prezidenti – Elbasy Nursultan Nazarbaevtyń Qazaqstan aýmaǵynda Resei men Ýkraina basshylary arasynda kelissózder ótkizýdi usynǵanyn eske saldy.
«Aradaǵy osyndai oqiǵalardan bizdiń elimiz kótergen beibit bastamalar kóleńkede qalyp qoidy. Máselen, jaqynda ǵana biz Resei men Ýkraina basshylary úshin óz alańymyzdy usynǵan edik. Bizdiń bul másele boiynsha áreketimiz – osy», - dedi Dáýren Abaev.
