Resei men Ýkraina qaqtyǵysy «Qazatomónerkásip» ulttyq kompaniiasynyń qyzmetine aitarlyqtai áser etken joq. Bul týraly kompaniianyń basqarma tóraǵasy Májit Sháripov málimdedi, dep habarlaidy QazAqparat.
Onyń aitýynsha, kompaniianyń barlyq kásiporyndary qaýipsizdikti qamtamasyz etý úshin der kezinde qabyldanǵan sharalardyń arqasynda úzilissiz jumys istedi jáne istep tur.
«Qazatomónerkásiptiń reseilik kompaniialarmen birlesken kásiporyndary bar, biraq olarmen yntymaqtastyqta qandai da bir ózgerister bolady dep oilamaimyz. Qazatomónerkásip óniminiń bir bóligin tasymaldaý Resei Federatsiiasynyń aýmaǵy arqyly júzege asyrylady. Qazirgi ýaqytta tasymaldaý bóliginde qandai da bir shekteýler baiqalǵan joq. Alaida, kompaniiada buryn sátti paidalanylǵan balamaly tasymaldaý marshrýttary bar ekenin de aitqym keledi», - dedi Sháripov kompaniianyń 2021 jylǵy jumys qorytyndysy týraly baspasóz máslihatynda.
Onyń aitýynsha, teńgeniń álsireýi de Qazatomónerkásiptiń qarjylyq jaǵdaiyna aitarlyqtai áser etpeidi, óitkeni kompaniia paidany negizinen AQSh dollarymen alady.
Bul aiyrbas baǵamynyń aýytqýlaryna bailanysty táýekelderden saqtaidy.
«Árine, bolyp jatqan jaǵdailar belgisizdik týdyrady. Biz oqiǵalardyń qalai órbitinin jáne bolashaqta kompaniianyń qarjylyq jaǵdaiyna nemese operatsiialyq qyzmetine qandai áser etetinin boljai almaimyz. Alaida biz qazirgi jaǵdaidy jiti qadaǵalap otyramyz jáne táýekelderdi azaityp, qyzmetimizdiń turaqtylyǵy men tiimdiligin qamtamasyz etetin sheshimder qabyldaýǵa daiynbyz», - deidi Qazatomónerkásip basshysy.
Qazatomónerkásip tabiǵi ýran óndiretin álemdegi eń iri ýran óndirýshi bolyp sanalady. Toptyń saladaǵy eń iri rezervtik ýran bazasy bar. Qazatomónerkásip enshiles, basybaily jáne birlesken uiymdarmen birge 14 ýran óndirýshi kásiporynǵa biriktirilgen 26 ken ornyn igerýde. Barlyq ýran óndirýshi kásiporyndar Qazaqstan Respýblikasy aýmaǵynda ornalasqan jáne ýran óndirý kezinde jerasty uńǵymalyq shaimalaý tehnologiiasyn qoldanady.
Qazatomónerkásiptiń baǵaly qaǵazdary London qor birjasynda, Astana International Exchange birjasynda jáne Qazaqstan qor birjasynda ornalastyrylǵan.
Qazatomónerkásip Qazaqstan Respýblikasynyń Ulttyq atom kompaniiasy jáne toptyń negizgi klientteri – atom óndirýshi qýattardyń operatorlary, al ónimder úshin negizgi eksporttyq naryqtar – Qytai, Ońtústik jáne Shyǵys Aziia, Soltústik Amerika jáne Eýropa bolyp otyr.
