Resei prezidenti Vladimir Pýtin qosymsha mobilizatsiiaǵa qajettilik joq ekenin málimdedi, dep habarlaidy Sputnik Qazaqstan agenttigi.
Onyń aitýynsha, qazir Reseide josparlanǵan úsh júz myń adamnyń 222 myńy mobilizatsiialanǵan.
"Qorǵanys ministrligi bastapqyda úsh júz myń emes, budan da az sandy josparlaǵan. Qazir qosymsha eshteńe josparlanyp otyrǵan joq. Qorǵanys ministrliginen eshqandai usynys túsken joq. Bolashaqta buǵan (mobilizatsiiaǵa – Sputnik eskertp.) qajettilik kórip turǵan joqpyn", - dedi Pýtin Astanada ótken baspasóz máslihatynda.
Resei lideri "ishinara mobilizatsiia" shamamen eki aptadan keiin aiaqtalatynyn atap ótti.
Buǵan deiin Pýtin mobilizatsiiadan Qazaqstanǵa qashyp kelgen reseilikter týraly pikir bildirgen bolatyn.
