Memleket basshysy Qasym-Jomart Toqaev Qazaqstanǵa resmi saparmen kelgen Resei Federatsiiasynyń Qorǵanys ministri Sergei Shoigýdi qabyldady, dep habarlaidy Aqorda.
Kezdesý barysynda Qazaqstan men Reseidiń áskeri jáne áskeri-tehnikalyq yntymaqtastyǵyn nyǵaitý máseleleri talqylandy.
«Áskeri-tehnikalyq sala, áskeri baǵyt Qazaqstan Respýblikasy men Resei Federatsiiasy arasyndaǵy strategiialyq seriktestik pen odaqtastyq qatynastarda mańyzdy oryn alady», – dedi Prezident.
Memleket basshysy eki el arasyndaǵy qol qoiylǵan Áskeri yntymaqtastyq týraly shartty quptady jáne onyń Resei Qorǵanys ministriniń Qazaqstanǵa jasaǵan saparynyń mańyzdy nátijeleriniń biri ekenin aitty.
Qasym-Jomart Toqaev Sergei Shoigýdi Jeńistiń 75 jyldyǵyna arnalǵan paradtyń joǵary deńgeide uiymdastyrylyp, tabysty ótkizilgenimen quttyqtady.
Resei Qorǵanys ministri kezdesýge jáne qazirgi zamannyń ózekti máselelerin talqylaýǵa múmkindik jasaǵany úshin Qazaqstan Prezidentine alǵys aitty.
«Áskeri jáne áskeri-tehnikalyq yntymaqtastyqtyń dástúrli strategiialyq jáne odaqtastyq sipaty bar. Búgingi qol qoiǵan kelisimniń asa mańyzdy ekeni sózsiz. Bul barlyq áskeri yntymaqtastyq týraly kelisimderdiń ishindegi eń aýqymdysy ári mazmundysy», – dedi Sergei Shoigý.
Reseidiń Qorǵanys ministri Qazaqstan áskerileriniń Qyzyl alańda ótken Jeńistiń mereitoilyq paradyna joǵary deńgeide qatysqany úshin Memleket basshysyna alǵysyn bildirdi. Onyń aitýynsha, bul eki el arasyndaǵy qatynastardyń joǵary deńgeide ekenin kórsetti. Sonymen qatar ol Qazaqstan Qarýly Kúshteri sarbazdarynyń Halyqaralyq áskeri oiyndarǵa belsendi qatysqanyn atap ótti.
Kezdesý sońynda Qazaqstan Prezidenti áskeri jáne áskeri-tehnikalyq yntymaqtastyqty damytýǵa qosqan úlesi úshin Sergei Shoigýdi I dárejeli «Dostyq» ordenimen marapattady.
Buǵan deiin habarlaǵanymyzdai,búgin Nur-Sultanda Qazaqstannyń Qorǵanys ministri Nurlan Ermekbaev reseilik áriptesi Sergei Shoigýmen kezdesti. Kezdesý barysynda QR men RF arasyndaǵy áskeri yntymaqtastyq týraly jańartylǵan shart jasaldy.
