2025 jyly Qazaqstandaǵy Ile-Balqash qoryǵyna Reseiden úsh Amýr jolbarysy ákelinedi. Bul týraly Ekologiia, geologiia jáne tabiǵi resýrstar ministri Serikqali Brekeshev málimdedi, dep habarlaidy Sputnik Qazaqstan agenttigi.
Onyń aitýynsha, qazir 415 myń gektar aýmaqta Ile-Balqash qoryǵy qurylǵan. Al qyrkúiekte Reseide ótken ekonomikalyq forýmda eki tarap memorandýmǵa qol qoidy. Qazir jol kartasy ázirlenip jatyr.
"2025 jyly biz alǵashqy Amýr jolbarystaryn ákelýdi josparlap otyrmyz. Olardyń ekeýi urǵashy, bireýi erkek. Tiisti jumys qazir júrip jatyr. Jemshóp qory daiyn. Qabandar men elikter de jeterlik", - dedi Brekeshev Májilis kýlýarynda.
Bul rette jýrnalister qoryq mańynda turatyn halyqtyń qaýipsizdigi qalai qamtamasyz etiletinin surady.
"Men jabaiy ańdar úshin kepildik bere almaimyn. Biz rezervat qurý jaily aityp otyrmyz. Sol sebepti jolbarystar azamattarymyzǵa qaýip tóndiredi dep sanamaimyn", - dedi ol.
Ministrdiń aitýynsha, Qazaqstan men Resei arasynda jolbarystardyń aqysyna qatysty eshqandai ýaǵdalastyq joq. Óitkeni kórshi el jyrtqyshtardy tegin beredi.
"Resei bizge ony tegin beredi. Sol sebepti bul jerde aqsha tóleý máselesi turǵan joq", - dep naqtylady Brekeshev.
Sondai-aq Ekologiia ministri "Amýr jolbarysy Turan jolbarysyna qalai ainalady" degen suraqqa jaýap berdi.
"Bizdiń ǵalymdar DNQ boiynsha Amýr jolbarysy Turan jolbarysyna qatty uqsaitynyn anyqtady. Sol sebepti Amýr jolbarysyn Ile-Balqash qoryǵynyń aýmaǵyna kóshirý týraly sheshim qabyldandy", - dedi vedomstvo basshysy.
