Qazaqstanǵa tiesili iadrolyq oqtumsyqtan tárkilengen ýran bóligi úshin Resei bizdiń elge 130 milliard teńgeden astam (shamamen 305 million dollar) ótemaqy tóledi. Bul týraly Ulttyq qaýipsizdik komitetiniń tóraǵasy Kárim Másimov málimdedi, dep jazady Sputnik Qazaqstan.
"Qazaqstandaǵy quzyrly organdardyń aldynda iadrolyq qarýsyzdandyrý baǵdarlamasy aiasynda oqtumsyqtardan reseilik tarap tárkilegen qazaqstandyq ýran úlesi úshin aqshalai ótemaqy alý týraly ózekti másele turdy. Nátijesi – biýdjetke 136,1 milliard teńge kóleminde qarajat tústi", - dedi Másimov.
Onyń aitýynsha, ortaaziialyq respýblikalardyń birindegi arnaiy qyzmetpen yntymaqtastyq nátijesinde Qazaqstan UQK iadrolyq materialdardyń zańsyz ainalymymen ainalysqan transulttyq qylmystyq toptyń jolyn kesti. Ol qylmystyq top quramynda Ortalyq Aziia elderiniń azamattary bolǵan, dep habarlady UQK baspasóz qyzmeti.
Jalpy 2020 jyldyń ózinde-aq memlekettik ekonomikalyq damý baǵdarlamalaryn baqylaý, sondai-aq sheteldik investorlar, qarjy-ónerkásiptik toptar men transulttyq kompaniialardyń jumysyn qadaǵalaý aiasynda el biýdjetindegi 925,3 milliard teńge (2,1 milliard dollar) shyǵynnyń aldyn alý múmkin boldy. Sondai-aq memleket paidasyna 147,23 milliard teńge (shamamen 345 million dollar) kiris kirdi.
Esirtki qurylymdaryn joiý
Kárim Másimovtyń aitýynsha, Qazaqstan "ulttyq qaýipsizdikke qater tóndiretin jáne ult densaýlyǵyna nuqsan keltirýdi kózdeitin transulttyq qurylymdardyń belsendi esirtki ekspansiiasynyń nysanyna" ainaldy.
"11 halyqaralyq jáne 23 óńirlik esirtki tasymaldaý arnasynyń joly kesildi. 15 iri esirtki zerthanasynyń kózi joiylyp, transulttyq esirtki qurylymynyń 26 qatysýshysy ustaldy, zańsyz ainalymnan aýǵan óndirisine jatatyn bir tonnadan astam esirtki tárkilendi", - dedi UQK basshysy.
Qazaqstan osy salada Ortaaziialyq óńirlik aqparattyq úilestirý ortalyǵy (OÓAÚO) jáne AQSh ádilet ministrliginiń Federaldyq esirtkimen kúres basqarmasymen, sondai-aq Aýǵanstan jáne Ózbekstandaǵy quzyrly organdarmen yntymaqtastyq ornatqan.
Memlekettik shekara kúzeti
UQK tóraǵasynyń aitýynsha, respýblikanyń memlekettik shekarasyn qorǵaý jáne kúzetý eldiń ulttyq qaýipsizdigin qamtamasyz etýdegi áleýetterdiń biri bolyp qala beredi.
"Terrorizm, zańsyz migratsiia men esirtki ainalymy órshigen shaqta shekara vedomstvosynyń qyzmeti jetildirilip jatyr. Shekara qyzmetiniń oblystyq departamentterin qurý arqyly shekara kúzetiniń aimaqtyq printsipi iske asyrylyp, olardyń materialdyq-tehnikalyq bazasy kúsheitilýde", - dedi ol.
2021 jyldyń 6 aiynda qazaqstandyq shekarashylar 5 myńnan astam quqyq buzýshyny ustap, 10 myń oq-dári, 2 myń elektroshoker, 12 myń birlik sýyq qarýdyń shekara arqyly ótýin shektedi.
Atap ótsek, búgin Qazaqstanda Ulttyq qaýipsizdik organdary kúni atalyp ótýde.
