Qorǵanys ministriniń orynbasary Reseidiń Embi poligony territoriiasynda qandai synaqtar júrgizgenin aityp berdi, - dep habarlaidy "Ult aqparat" kaz.tengrinews.kz portalyna silteme jasap.
Senator Muratbai Joldasbaev Parlament palatasynyń otyrysynda qorǵanys ministriniń orynbasarynan Emdi synaq poligonynda qandai qarý túrleriniń qoldanylǵanyn surady.
"Himiialyq nemese biologiialyq qarý túrleri qoldanyldy ma? Qandai da bir ekologiialyq nemese topyraq-himiialyq saraptama júrgizildi me? Bul suraqty jerimizdiń qandai jaǵdaida qaitarylyp jatqanyn túsiný úshin qoiyp otyrmyn", - dedi depýtat.
Ministrdiń orynbasary poligonnyń 1960 jyly zertteý jumystaryn, jattyǵýlardy júrgizý úshin qurylǵanyn aitty.
"Negizinde, ol jaqta qurlyq áskeriniń áýe shabýylyna qarsy qarýy qoldanyldy. Barlyq raketa otynmen atylady. Basqa qarýlarǵa qaraǵanda, munyń tabiǵatqa ziiany joq. Sonymen qatar, ótken jyly biz ákimdikpen birge zertteý júrgizdik, topyraǵyn tekserdik. Zerthana saraptamasynyń qorytyndysynda normadan asatyn jaǵdai bolmady", - dep habarlady Oqas Saparov.
Senat depýtaty Ikram Adyrbekovtyń aitýynsha, Qazaqstan Prezidenti poligondar sanyn azaitýdy tapsyrǵan.
"Osyǵan bailanysty 2014-2016 jyldar aralyǵynda Qaraǵandyda, Atyraýda, Qyzylordada, Aqtaýda jáne Batys Qazaqstan oblysynda, Saryshaǵan poligonynda, Shýda qysqartylyp, 1,5 million gektar jer berilgen. Buǵan depýtattarymyzdyń yqpaly bolǵanyn bilemiz. Osyǵan bailanysty bizdiń qoǵamda túrli dúrligý paida boldy. Qazir tynyshtaldy", - dedi senator Adyrbekov.
