Úskirik aiaz ben politsiianyń qysymyna qaramastan, Resei qalalarynda myńdaǵan adam oppozitsiiadaǵy saiasatker Aleksei Navalnyidy qamaýdan bosatýdy talap etip, mitingige shyqty.
Kremldi ótkir synap júrgen Navalnyi Germaniiada em alyp kelgen bette, 17 qańtarda Máskeý áýejaiynda ustalǵan. Byltyr tamyzda "Novichok" ýymen ýlanyp, es-tússiz kúiinde Germaniiaǵa jetkizilgen ol sonda uzaq ýaqyt emdelip, eline qaitqan edi.
Alǵashqy demonstratsiialar Qiyr Shyǵys pen Sibirde ótti. Habarovsk, Vladivostok jáne basqa qalalarda kúnniń sýyqtyǵyna jáne qaýipsizdiktiń kúsheitilgenine qaramastan, júzdegen adam kóshege shyqty.
Politsiia belsendiligine baqylaý jasap otyratyn "OVD-info" tobynyń málimeti boiynsha, ondaǵan adam ustalǵan, politseiler ustalǵandardyń keibirin uryp jatyr degen de aqparat bar.
Vladivostokta túsirilgen videoda arnaiy kiim kiip, rezeńke shoqpar ustaǵan politseiler narazylardy kúshpen taratýǵa tyrysyp jatqany baiqalady.
Qatty jelge jáne aýa raiynyń 50 gradýsqa deiin sýytqanyna qaramastan, Qiyr Shyǵystaǵy Iakýtsk qalasynda jurt narazylyq sharasyn ótkizgen.
Ádette bilikke narazylyq jiyndaryna kisi kóp jinalatyn Máskeýde Pýshkin alańynda demonstratsiia ótpek.
Reseidiń 65 qalasynda uiymdastyrylady degen jappai narazylyq qarsańynda politsiia Navalnyi jaqtastaryn ustap, áleýmettik media platformalarynda "ruqsat etilmegen mitingige" shaqyrǵan adamdarǵa aiyppul salynady dep eskertý jasady.
Pandemiia men ekonomikalyq toqyraý kezinde, qystyń ortasynda ótip jatqan Navalnyi jaqtastarynyń bul narazylyǵy qyrkúiekte ótedi degen parlament sailaýynyń qarsańynda Resei biligi úshin úlken synaq bolmaq.
Kreml ádette 44 jastaǵy Navalnyidyń qoǵamdaǵy rólin elemegendei syńai tanytady, degenmen oppozitsiia belsendileriniń aitýynsha, quqyq qorǵaý organdarynyń Navalnyi men onyń jaqtastaryna qarsy áreketi biliktiń odan qatty qorqatynyn aiǵaqtaidy.
"Kreml narazylyqtyń aldyn almaq bolǵan jantalas ústinde ózin ózi aiaǵynan atty. 23 qańtardaǵy demonstratsiia birden nátije bermeýi múmkin, biraq Aleksei Navalnyidy bosatýdy talap etemiz jáne mundai aktsiialar qaita-qaita ótkizile beredi" dedi Azattyqtyń "Nastoiashee vremia" arnasyna suhbat bergen "Jemqorlyqpen kúres" qorynyń úilestirýshisi Leonid Volkov.
Sońǵy kúnderi politseiler tintý júrgizip, belsendilerdi qamaý arqyly narazylyqty kúshpen basyp tastaýǵa ázir ekenin ańǵartty.
Navalnyi jaqtastary biliktiń "kóshege shyqpa" degen eskertýin elemeýge shaqyrdy.
"Ruqsat etilmegen miting uiymdastyrdy" dep qamaýǵa alynǵan Navalnyidyń baspasóz hatshysy Kira Iarmysh Twitter arqyly úndeý jasady. "9 táýlikke qamaldym. Biraq sizder ne isteý keregin bilesizder. 23 qańtar, saǵat 14:00-de qalanyń basty kóshelerine shyǵyńyzdar" dep jazdy Iarmysh.
