AQSh, Italiia jáne basqa elderdiń ýniversitetterinen zertteýshiler toby The Lancet jýrnalynyń redaktsiiasyna hat jazyp, preparatty synaý nátijelerinde statistikalyq aýytqýlar bar ekendigin aitqan, dep habarlaidy TASS saity.
Reseidiń «Spýtnik V» vaktsinasyn synaýdyń eki kezeńdegi nátijelerin The Lancet ǵylymi jýrnalynda jariialaý – vaktsina ázirleýdiń sapasyn arttyratyn oń qadam. Seisenbide TASS tilshisine bergen suhbatynda RǴA korrespondent-múshesi, Soltústik Karolina ýniversitetiniń (AQSh) jáne M.V. Lomonosov atyndaǵy Máskeý memlekettik ýniversitetiniń professory Aleksandr Kabanov osyndai pikir bildirdi.
«Reseilik vaktsina jaily málimetterdi synaýǵa keler bolsaq, birinshiden, nátijelerdi synaý – qalypty ǵylymi protsestiń bóligi. Ásirese pandemiia jaǵdaiyndaǵy vaktsina nemese dári-dármek siiaqty áleýmettik mańyzy bar jumystarǵa qatysty atatyn bolsa», – deidi RǴA korrespondent múshesi.
«Ekinshiden, bul Reseige, vaktsinaǵa nemese ǵalymdarǵa qarsy baǵyttalǵan syn emes. Mysaly, úsh ai buryn, eki jýrnaldan, sonyń ishinde osy The Lancet jýrnalynan amerikalyq ǵalymdardyń maqalalary alynyp tastalǵan edi. Sebebi nátijeler synǵa ushyraǵan jáne maqala avtorlary dári-dármekti koronavirýsty emdeýde qoldaný týraly alǵashqy málimetterdi berýden bas tartqan», – dedi ǵalym.
«Úshinshiden, syn aitý – nátije durys emes degendi bildirmeidi. Muny synshylar da aityp otyr. Olar bastapqy sandyq derektersiz Resei vaktsinasy týraly maqaladaǵy málimetterdiń senimdiligi jóninde qorytyndy jasaý múmkin emes ekenin atap ótti», – dep túsindirdi Kabanov.
«Gamaleia institýtynda jasalǵan reseilik vaktsina sátti bolady dep úmittenemin. Osyǵan bailanysty men ony ázirleýshilerge, sondai-aq koronavirýsqa qarsy senimdi jáne qaýipsiz vaktsinany qajet etetin barlyq Resei azamattaryna sáttilik tileimin», – dedi ǵalym.
