Foto: ashyq derekkóz
2025 jyldyń 28 shildesinde Almetevsk qalasynda (Tatarstan Respýblikasy, Resei) «Karakýz film» halyqaralyq kinofestivaliniń ashylýy ótti. Festival baǵdarlamasyna Qazaqstan, Ózbekstan, Tájikstan, Grýziia jáne Reseidiń ártúrli óńirlerinen otyzdan astam film endi, dep habarlaidy Ult.kz.
Festival shymyldyǵyn QR Mádeniet jáne aqparat ministrligi men Ulttyq kinony qoldaý memlekettik ortalyǵynyń qoldaýymen túsirilgen «Shatyrdaǵy ekeý» filmi ashty. Filmdi festival aiasynda prodiýser Áliia Sháripbaeva tanystyryp, shyǵarmashylyq kezdesý ótkizdi. Prodiýser túsirilim protsesi týraly áńgimelep, kópshilik suraqtaryna jaýap berdi.
«Shatyrdaǵy ekeý» filmi – Gúlshat Smaǵulovanyń alǵashqy rejisserlik jumysy. Kartina taǵdyry qiyndyqqa toly jas jigit Damir men aýtizm dertine shaldyqqan jasóspirim Kostianyń arasyndaǵy dostyqty baiandaidy. Shyǵarmashylyq top kartinada inkliýziianyń mańyzyn jáne erekshe balalardyń qoǵamǵa beiimdelý máselesin kótergen.
Festival aiasynda frantsýz kúresinen álem chempiony atanǵan alǵashqy qazaq palýany – Qajymuqan Muńaitpasov týraly baiandaityn «Qajymuqan» filmi de kórsetildi. Ol – halyqaralyq, resei jáne búkilodaq chempionattarynda asa aýyr salmaq dárejesinde jeńiske jetip, elýge jýyq medal ielengen tarihi tulǵa. Kartina ańyzǵa ainalǵan sportshynyń erligi men ulttyq maqtanyshqa ainalǵan jolyn kórsetedi.
Aita keteiik, «Karakýz film» – kórermenniń ózi qazylyq etetin jeti kúndik kinofestival. Baiqaý baǵdarlamasynda alty nominatsiia qarastyrylǵan. Atap aitsaq, «Úzdik kórkem film», «Úzdik derekti film», «Úzdik animatsiialyq film», «Úzdik qysqametrajdy film», «Balalar kózaiymy júldesi», «Karakýz film» Gran-prii jáne bes arnaiy júlde tabys etiledi.
Festivalge qazaqstandyq filmderdiń qatysýy ulttyq kinematografiiaǵa degen qyzyǵýshylyqty kórsetip qana qoimai, onyń halyqaralyq mádeni keńistiktegi mańyzyn da aishyqtaidy.
