Resei Ýkrainaǵa basqynshylyq jasaǵan sátten bastap, reseilik saiasatkerlerdiń postkeńestik elderge qatysty kúdigi men talaptary arta tústi. Ózge elge talap qoiýdan taiynbaityn basqynshylar endigi tańda tipti, biozerthanalar atty taqyrypty qyzdyryp jatyr. Olar «Ýkraina jerinen bólek, Grýziia men Qazaqstanda da AQSh-tyń biozerthanalary bar», - deidi. «Ony tekserý kerek, teksermesek kózin joiý kerek», - degendi emin-erkin aitatyn boldy.
Máskeý qalalyq dýmasynyń depýtaty, Resei Federatsiiasy Kommýnistik partiiasynyń múshesi Sergei Savostianov Ýkrainadaǵydai, Qazaqstan, Baltyq elderi men Moldovada áskeri operatsiia ótkizýdi usyndy, dep habarlaidy Abai.kz saity.
«Ýkrainany demilitarizatsiialaý jáne denatsifikatsiialaý Ýkraina, Resei jáne búkil Eýropa halyqtary úshin turaqty qaýipsizdikti qamtamasyz etedi. Resei Federatsiiasynyń qaýipsizdigin qamtamasyz etýdiń neǵurlym tolyq protsesi úshin Ýkrainadan basqa Baltyq jaǵalaýy elderin, Polsha, Moldova jáne Qazaqstandy denatsifikatsiialaýdy oryndy dep sanaimyn», - depti ol.
Ol bul týraly arnaiy usynys qujatyn jasap, onyń úlgisin áleýmettik jelige jariialaǵan. Resei áskeri basqynshylyq jasap, 24 aqpanda Ýkrainaǵa basyp kirgen bolatyn. Resei 1351 adamy qaza tapqanyn moiyndady.
