Resei Qazaqstanmen josparlanǵan barlyq ǵarysh baǵdarlamasyn júzege asyrady. Bul týraly tsifrlyq damý, innovatsiialar jáne aeroǵarysh ónerkásibi ministri Baǵdat Mýsin málimdedi, dep habarlaidy Sputnik Qazaqstan.
Májilis otyrysynan keiin jýrnalister ministrden Resei Baiqońyrdy jalǵa alýdan bas tartýy múmkin be dep surady.
"Keshe Rogozin myrza ("Roskosmos" bas direktory Dmitrii Rogozin – Sputnik) jospar ózgermegenin málimdedi. Olar Qazaqstanmen odan ári jumys istei beretinin jáne josparlanǵan barlyq ǵarysh baǵdarlamasyn júzege asyratynyn aitty", - dep jaýap berdi Mýsin.
Aitýynsha, Qazaqstan reseilik áriptesterimen kelissóz júrgizedi.
"Bizde shamamen 15-20 sáýirde olarmen birqatar másele boiynsha kelissózder josparlanǵan. Sonyń ishinde aldaǵy jyldarǵa arnalǵan perspektivaly jobalar da bar", - dep naqtylady ministr.
Mýsin Resei Baiqońyrdy jalǵa alyp otyrǵany úshin jylyna 100 million dollardan astam aqsha tóleitinin atap ótti. Kelisimshart 2050 jylǵa deiin bekitilgen.
