Máskeý barlyq memleketterdi BUU Bas Assambleiasynyń 73-shi sessiia alańynda Qazaqstan usynǵan Terrorizmnen azat álemge qol jetkizý minez-qulyq kodeksine qosylýǵa shaqyrdy. Bul týraly RF SIM-niń dúisenbide jariialanǵan habarlamasynda jazyldy, dep habarlaidy "Ult aqparat" TASS agenttigine silteme jasap.
«BUU Bas Assambleiasynyń minberinde 2015 jyly sóilep turyp, Qazaqstan jáne Resei Prezidentteri Nursultan Nazarbaev pen Vladimir Pýtin terrorizmmen kúreste birlesken front qurý jáne barlyq memleketter halyqaralyq quqyqtar normalaryna sáikes jumys atqara alatyndai bastama tastaǵan bolatyn. Araǵa týra úsh jyl salyp halyqaralyq terrorizmniń qaýipterin eńserýge umtylatyn koalitsiia qurýǵa kelisken 70 memleket atalmysh usynysty nazarǵa aldy», - delingen diplomatiialyq vedomstvonyń habarlamasynda.
Ministrlikte atalyp ótkendei, kodeks «halyqaralyq terrorizmge qarsy kúrestiń irgeli qaǵidattaryn biriktirip qana qoimai, árbir memleketti terror qaýpinen qutqara alady». «Qujat antiterror salasynda álemdik birlestikterdiń birlesken praktikalyq baǵyttaryn aiqyndap bere alady».
Reseilik tarap «qujat avtory - qazaqstandyq seriktesterge, qujattyń daiyndalýyna úles qosqan barlyq memleketterge alǵysyn aitady».
«Barlyq memleketterdi osy Kodekske qosylýǵa, sonymen qatar, BUU Jarǵysy bazasynda tanylǵan terrorizmniń qandai da bir túri baiqalǵan jaǵdaida osy qujat tártibin negizge alýǵa shaqyramyz», - delingen habarlamada.
Aita ketsek, budan buryn QR Syrtqy ister ministri Qairat Ábdirahmanov BUU Bas Assambleiasynyń 73-shi sessiiasynda pikirtalasta sóilegen sózinde Terrorizmnen azat álemge qol jetkizý minez-qulyq kodeksine qol qoiǵan memleketterdiń bárine alǵys bildirgen bolatyn.
