Qazaqstandyq jáne reseilik birqatar elektrondy BAQ-ta Qazaqstan tarapynyń Balqash torabyn berý sharttary men odan ary paidalaný tártibi týraly úkimetaralyq kelisimdi buzatyny týraly aqparat tarady. Osyǵan orai QR Qorǵanys ministrliginiń kelisimdi júzege asyrý máselelerin qarastyrý jónindegi ýákili, polkovnik Rýslan Ámirgereev túsinik berdi, dep habarlaidy "Ult aqparat".
«2019 jyly Qazaqstannyń Syrtqy ister ministrligi Resei tarapynyń Balqash torabyn paidalaný jónindegi kelisimdi denonsatsiialaý jospary týraly resmi aqparat aldy. Osy jyldyń shildesinde ǵaryshtyq áskerdiń bas qolbasshysy, general-polkovnik Aleksandr Golovko RF Federatsiiasy keńesine usynys jasap, onda Qazaqstan aýmaǵyndaǵy eskirgen «Dnepr» radiolokatsiialyq stansasyn kútip ustaýdyń maqsatqa sai emestigin negizdep berdi. Qazirgi ýaqytta reseilik armiianyń qarý-jaraǵyna jańa «Voronej» radiolokatsiialyq stansasy túsip jatyr. Bul stansa qazirdiń ózinde Barnaýyl men Orsk aýdandarynda ornalastyrylǵan. Óziniń taktikalyq-tehnikalyq sipattamasy boiynsha olar Balqash torabynda ornatylǵan «Dneprden» basym túsedi. Osylaisha, Memlekettik dýma kelisimdi denonsaktsiialaý týraly zańdy qabyldap, RF Federaldyq jinalysynyń Federaldyq keńesi maquldady. Al osy jyldyń 31 maýsymynda Resei Prezidenti Vladimir Pýtin qol qoidy»,- deidi ol.
Polkovniktiń atap ótýinshe, kelisim qoldanysy 2020 jyldyń jeltoqsanynda toqtaidy. Bul rette Balqash torabynyń jer ýchaskesi men múlkin berý-qabyldaý birlesken komissiia arqyly júzege asyrylady.
Balqash toraby 1964 jyly salynyp, 1973 jyly paidalanýǵa berilgen. Ol óziniń qoldanys aýmaǵynda áýe jáne ǵarysh keńistigine úzdiksiz barlaý júrgizýge arnalǵan.
Bul burynǵy Keńes odaǵy kúiregennen keiin Qazaqstan aýmaǵynda qalǵan nysandardyń biri sanalady. Torapty Resei taraby qaitarymsyz negizde paidalandy.
«Stansa zamanaýi talaptarǵa sai kelmeitindikten Qazaqstannyń Qorǵanys ministrligi Balqash toraby aýmaǵynan reseilik áskeri bólim shyǵarylǵannan keiin «Dnepr» stansasyn joiý týraly sheshim qabyldady. Buǵan qosa, kelisimniń 6-baby 1-tarmaǵyna sáikes, RF Úkimeti Qazaqstan Respýblikasynyń memlekettik jáne áskeri basqarýyndaǵy pýnktterde reseilik júieden zymyran shabýyly týraly eskertý aqparatyn kórsetetin «Krokýs» apparatyn ornatý mindettemesin alyp otyr», - deidi Rýslan Ámirgereev.
