Resei arhivterindegi Qazaqstandaǵy asharshylyqqa qatysty qupiia qujattar jinaq bolyp shyǵady. Bul jaiynda Senat depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Biyl Resei Federatsiiasynyń Federaldy arhivi men Ortalyq memlekettik arhiv qujattary negizinde «Golod v Kazahstane i Rossii» (joba) atty qujattar jinaǵyn shyǵarý josparlanýda. Jinaqqa qupiia belgisi alynǵan 400 qujat kiredi», - dedi Asqar Mamin.
Úkimet basshysynyń atap ótýinshe, arhiv isi salasyndaǵy halyqaralyq yntymaqtastyqty damytý aiasynda Armeniia, Ázerbaijan, Belarýs, Iran Islam Respýblikasy, Qytai Halyq Respýblikasy, Litva, Egipet Arab Respýblikasy, Mońǵoliia, Polsha, Resei Federatsiiasy, Túrkiia, Ýkraina, Finliandiia, Estoniianyń tiisti memlekettik organdarymen, sonymen birge Amerika Qurama Shtattarynyń Holokost Memorialdy mýzeiimen 17 kelisim men memorandýmǵa qol qoiyldy.
«Sonymen birge Bilim jáne ǵylym ministrligi 2020-2022 jyldarǵa arnalǵan granttyq qarjylandyrý aiasynda muraǵat qujattarynyń jinaqtaryn, sheteldik reiting basylymdaryndaǵy maqalalardy basyp shyǵarýdy josparlaýda. Bul jumystar asharshylyqtyń tolyq ashylmaǵan betterin zertteýge úles qosady. Sondai-aq ministrlikpen 2021-2023 jyldarǵa arnalǵan baǵdarlamalyq-nysanaly qarjylandyrý aiasynda jariialanǵan konkýrsta «HH ǵasyrdyń 20-30 jyldaryndaǵy Qazaqstandaǵy asharshylyq: pánaralyq zertteýlerdiń jańa tájiribesi men nátijeleri» taqyrybyndaǵy tehnikalyq tapsyrma ázirlendi», dedi Premer-Ministr.
