Resei eki "iadrolyq bombalaýshysyn" Aliaska shtatymen shekaralas qiyr shyǵystaǵy aýdanyna ushyrǵanyn aitty. Bombalaýshylar jattyǵý aiasynda ushyrylǵan. Resei memlekettik arnalarynyń sózinshe, bul Máskeýdiń AQSh shekarasyna iadrolyq qarý jetkize alatynyn kórsetken.
14 tamyzda Resei qorǵanys ministrligi Tý-160 bombalaýshy ushaǵy 8 saǵatta 6 000 shaqyrymǵa - Saratovtaǵy bazadan Chýkotkadaǵy Anadyrǵa deiin ushyp barǵanyn habarlady. Anadyr qalasy Bering buǵazy arqyly AQSh-tyń Aliaska shtatymen shekaralas.
SSSR kezinde qurastyrylǵan tez ushatyn ushaq shaǵyn radiýstaǵy 12 iadrolyq zymyrandy artyp, toqtamastan 12 myń shaqyrym usha alady.
Resei qorǵanys ministrligi ushaqtardyń jiberilýi osy aptanyń sońyna deiin jalǵasatyn "taktikalyq jattyǵýdyń bir bóligi" bolǵanyn aitty.
Biyl 2 tamyzda 31 jyl buryn AQSh pen Resei qol qoiǵan iadrolyq kelisimniń kúshi joiyldy. 1987 jyly sovet úkimeti men AQSh radiýsy 500-5500 shaqyrym bolatyn ballistikalyq jáne qanatty zymyrandardy qurastyrmaýǵa ózara kelisken edi. Sarapshylar bul kelisimniń joiylýy Resei men AQSh arasyndaǵy qarýlaný básekesin kúsheitedi dep qaýiptenedi.
Kelisimge sáikes, eki tarap iadrolyq oqtumsyqtardyń sanyn aldaǵy jeti jyl ishinde - 1550-ge deiin, qurlyqtaǵy, teńizdegi jáne áýedegi ballistikalyq zymyrandar sanyn 700-ge deiin azaitýy tiis bolǵan.
Zymyran týraly kelisim kúshiniń joiylýyna Vashington men Máskeýdiń bir-birin "kelisim-shartty buzdy" dep aiyptaýy sebep bolǵan. Buǵan deiin AQSh pen NATO reseilik 9M729 "Novator" qanatty zymyrany (SSC-8 dep te ataidy) kelisimde kórsetilgen shekten alysqa ushady dep Máskeýdi birneshe ret aiyptaǵan. Resei muny teristep, kelisim sharttaryn AQSh-tyń ózi buzyp otyr dep málimdegen. Vashington bul aiypty joqqa shyǵarǵan.
