Foto: ál-Farabi atyndaǵy QazUÝ-dyń Baspasóz qyzmeti
Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektor Janseiit Túimebaev aqyn, Qazaqstannyń eńbek sińirgen qairatkeri, Aitys aqyndary men jyrshy-termeshilerdiń halyqaralyq odaǵynyń tóraǵasy Júrsin Erman jáne jazýshy, filologiia ǵylymynyń doktory, abaitanýshy, alashtanýshy Tursyn Jurtbaimen kezdesti.
Qos rýhaniiat janashyry QazUÝ-dy bitirgenderine 50 jyl bolǵan saltanatty sharaǵa qatysý úshin arnaiy oqý ordasyna kelgen.
Ýniversitet basshysy Janseiit Túimebaev Júrsin Erman men Tursyn Jurtbaiǵa «Eren eńbegi úshin» altyn medalin tabystap, qalamgerlerdiń ulttyq mádeniet pen rýhaniiatty damytýǵa qosqan eleýli eńbekterin airyqsha atap ótti.
«Sizder oqyp, bilim alǵan QazUÝ qazirgi tańda damyp, gúldenip keledi. «Elý jylda – el jańa», biyl oqý ordasyna – 90 jyl. Memleket basshysy Qasym-Jomart Toqaevtyń qoldaýymen QazUÝ qalashyǵyn jańǵyrtýdyń ekinshi kezeńi qolǵa alynyp, jańa qurylystar bastaý aldy. Búgin ózderińiz ýniversitetke kelip, tynys-tirshiligimen tanysyp, jastarmen pikirlestińizder. Ýniversitet ózderińizdei qairatker túlekterin árdaiym maqtan tutady», – dedi rektor.
Óz kezeginde M.Maqataev atyndaǵy syilyqtyń eki márte iegeri, kórnekti aqyn Júrsin Erman kóshbasshy joǵary oqý ornyn mereili belesimen quttyqtap, ystyq lebizin jetkizdi. «Tól ýniversitetimizdiń mereitoiy aitýly oqiǵa. Búginde bilim ordasy alyp ýniversitetke ainaldy. Jumystaryńyzǵa sáttilik tileimin. Bolashaqta QazUÝ kórkeiip, úlkeiip, jańara bersin. Biz árdaiym tilektespiz», – dedi aqyn Júrsin Erman.
Sondai-aq kezdesýde Tursyn Jurtbai sóz sóilep, «Ál-Farabi atyndaǵy Qazaq ulttyq ýniversiteti – qazaqtyń ulttyq oilaý júiesiniń altyn uiasy» dep sanaitynyn basa aitty.
«Ár ulttyń oilaý júiesin, bolashaqqa baǵdaryn, ótken tarihyn boljap, zertteýge múmkindik beretin – ol ýniversitet. Keshegini, búgingini, erteńgini bailanystyryp, soǵan qozǵalys beretin mamandar daiyndalmasa, ult esh ýaqytta joǵary deńgeige kóterilmeidi. Farabi ýniversiteti aqyl-oidyń, qazaqy tárbieniń, ǵylymnyń bolashaqtaǵy kepili dep sanaimyn», – dedi Tursyn Jurtbai.
Qaragóz Serikqyzy,
ál-Farabi atyndaǵy QazUÝ, Baspagerlik, redaktorlyq jáne dizainerlik óner
kafedrasynyń oqytýshysy
