© Sputnik / Abzal Kaliev
Konstitýtsiialyq ózgeristerge arnalǵan respýblikalyq referendýmǵa 12 millionǵa jýyq adam qatysa alady. Bul týraly ortalyq sailaý komissiiasynyń tóraǵasy Nurlan Ábdirov málimdedi, dep habarlaidy Sputnik Qazaqstan.
Komissiianyń búgingi otyrysynda 5 maýsymdaǵy referendýmǵa qatysatyn adamdardyń sany pysyqtalǵan bolatyn.
"Referendýmdy uiymdastyrý men ótkizý jónindegi naýqan jańa kezeńge aiaq basty. Ýchaskelik referendým komissiialary jumysqa tolyǵymen kiristi. Barlyǵy 10 013 referendým ýchaskesi iske qosylady. 15 mamyrdaǵy aqparatqa súiensek, respýblikalyq referendýmǵa qatysýǵa quqyǵy bar azamattardyń tizimine 11 722 536 adam engizilgen", - dedi Ábdirov.
Onyń aitýynsha, 20 mamyrdan bastap kez kelgen adam turǵylyqty jeri boiynsha tizimde óz atyn teksere alady. Al qandai da bir ózgeris engizemin dese, ýchaskelik referendým komissiiasyna ótinish jazýǵa múmkindik bar. Ondai ótinishter sol kúni birden qaralady.
Sondai-aq, ortalyq sailaý komissiiasy respýblikalyq referendýmda daýys berýge arnalǵan biýlletenderdiń sanyn bekitti. 28 mamyrǵa deiin barlyǵy 11 839 761 biýlleten shyǵarylady.
