Qazaqstanda 10 013 referendým ýchaskesi iske qosylady. Bul týraly elordada Ortalyq referendým komissiiasynyń otyrysynda QR Ortalyq sailaý komissiiasynyń tóraǵasy Nurlan Ábdirov málim etti, dep habarlaidy QazAqparat.
«Búgin biz respýblikalyq referendýmdy ázirleýdiń mańyzdy máselelerin qarastyrdyq. Osylaisha, referendýmdy uiymdastyrý men ótkizý jónindegi naýqan jańa kezeńge aiaq basty. Ýchaskelik referendým komissiialary jumysqa tolyǵymen kiristi. Tyńdalǵan esepterge súiensek, naqty jumystar júrgizildi. Jalpy, 10 013 referendým ýchaskesi iske qosylady», - dedi N. Ábdirov.
Osy oraida OSK tóraǵasy atalǵan ýchaskelerde daýys berý úshin barlyq jaǵdai jasaýdy tapsyrdy.
«Respýblikalyq referendýmǵa qatysý quqyǵy bar azamattardyń tizimine toqtalsaq, 15 mamyrdaǵy aqparat boiynsha bul tizimde 11 mln 722 myń 536 adam engizilgen. Jergilikti atqarýshy organdar ýchaskelerdiń daýys berý kúnine daiyndyq máselelerin baqylaýda ustaýy qajet. Múgedektigi bar adamdar úshin barlyq jaǵdaidy qamtamasyz etý baǵytynda qajetti is-sharalardy júzege asyrýǵa nazarlaryńyzdy aýdaramyn. Osy oraida olarǵa yńǵaily bolýy úshin invotaksi tartý máseleleri jáne basqa da qadamdar qosymsha pysyqtalsyn», - dedi N. Ábdirov referendýmdy ótkizý jumystaryna jumyldyrylǵandarǵa qarata aitqan sózinde.
