© Sputnik / Vladislav Vodnev
Ortalyq sailaý komissiiasy tóraǵasynyń orynbasary Konstantin Petrov referendýmda daýys berý jáne qorytyndysyn shyǵarý tártibin jariialady, dep habarlaidy Sputnik Qazaqstan.
Zań boiynsha daýys berý úshin barlyq jaǵdai jasalýy shart. Múmkindigi shekteýli azamattar da kabinaǵa emin-erkin kirýi kerek. Osyǵan bailanysty barlyq ýchaskelik komissiia birinshi qabatta ornalasady. Al qajetti aqparatty alý úshin kompiýterler, qulaqqaptar, tipti, lýpa da bolýy qajet.
"Daýys berý ýchaskesinde tizim boiynsha árbir adamǵa bir biýlleten beriledi. Sol jerde qol qoiylady. Komissiia tóraǵasy men hatshysy biýlletendi bere almaidy. Ony komissiia músheleri jasaidy. Biýlleten alǵan adam kabinaǵa baryp, daýys beredi. Jaýaptyń nusqasyna qarama-qarsy turǵan kvadratta kez kelgen belgini qoiýǵa bolady. Qaryndashpen belgi qoiylmaidy, sondai-aq qandai da bir túzetý engizýge bolmaidy. Árbir adam ózi úshin daýys beredi. Onyń ornyna basqa bireý belgi qoia almaidy", - dedi Petrov komissiianyń búgingi otyrysynda.
Eger daýys beretin adam densaýlyǵyna jáne basqa da jaǵdailarǵa bailanysty kele almasa, referendýmǵa deiin 12 saǵat buryn jazbasha ótinish jibere alady. Sonyń negizinde komissiia músheleri onyń úiine ózderi barady.
Daýys berý ýchaskesinde árbir qoǵamdyq uiymnan bir adam baqylaýshy retinde otyra alady. Al bir buqaralyq aqparat quralynan eki jýrnalist jáne bir operator jiberiledi. Zań boiynsha halyqaralyq baiqaýshylarǵa qatysýǵa ruqsat berilgen. Olar biýlletenderdi sanaýdy da baqylai alady.
"Daýys berý aiaqtalǵannan keiin aldymen biýlleten alǵan adamdar esepteledi. Sodan soń paidalanbaǵan biýlletenderdi sanaý jáne joiý jumysy atqarylady. Sodan keiin ǵana kóshpeli jáshikter men ýchaskede turǵan jáshikter ashylady. Daýysty sanaý kezinde komissiia múshesi árbir biýlletendi ashyp, adamnyń tańdaýyn ashyq aitady. Sosyn bólek býmaǵa qoiady. Daýys sanaýdyń nátijesi boiynsha hattama rásimdeledi. Ony mindetti túrde bári tanysa alatyn jerge ilip qoiady", - dep atap túsindirdi komissiia tóraǵasynyń orynbasary.
Zań boiynsha daýys sanaýǵa 12 saǵat beriledi. Al referendýmnyń nátijesi resmi túrde jariialanǵan sátten bastap Konstitýtsiiaǵa ózgeris engiziledi. Ol úshin arnaiy zań nemese jarlyq qabyldaýdyń qajeti joq.
