Konstitýtsiiany túzetý mátini barlyq qazaqstandyqtarǵa jetkizilýi kerek. Bul rette respýblikalyq referendýmda daýys berýge arnalǵan biýlletende qysqa jaýaptar kózdeledi. Bul týraly Májilis depýtaty Arman Qojahmetov aitty, dep habarlaidy QazAqparat.
«Prezident Jarlyǵy Konstitýtsiiaǵa engiziletin túzetýlerdiń nysany men mátinin usynady. Azamattar óz sheshimderin shyǵarady. Olar «Iá» nemese «Joq» dep daýys bere alady. Biýlleten formasynda «iá» nemese «joq» degen qysqa jaýaptar ǵana bolady. Túzetýler mátini elimizdiń barlyq azamattaryna jetkizilýi tiis. Biz olarmen tanysyp, sodan keiin referendýmda tiisti sheshim qabyldaýymyz kerek», - dep túsindirdi depýtat Májilis otyrysynan keiin tilshilerge.
Májilis depýtatynyń aitýynsha, halyq referendýmǵa úlken qyzyǵýshylyq tanytady.
«Referendýmnyń sheshimi zańdy, óitkeni ol tiisti zańda solai jazylǵan. Biz áleýmettik jelilerde kórip otyrǵan usynystar men belsendilikke qarasaq, Konstitýtsiiaǵa túzetýler engizý máselesi qoǵamymyzdyń kóptegen azamattaryn tolǵandyrady. Sondyqtan, qyzyǵýshylyq úlken bolady dep oilaimyn», - dedi A.Qojahmetov.
Depýtat bul túzetýlerde Elbasy mártebesi týraly jáne Tuńǵysh Prezidenttiń táýelsiz Qazaqstan memleketiniń negizin qalaýshy ekendigi týraly sózder alynyp tastalatynyn eske saldy.
Sonymen birge, tilshiler «Tuńǵysh Prezident – Elbasy týraly» zańnyń kúshin joiýy múmkin be degen suraq qoidy.
«Iá dep oilaimyz, qujattar paketinde qarastyrylǵan. Biraq sheshimdi turǵyndar referendýmda qabyldaidy. Eger bul úshin qoǵam daýys berse, tiisinshe, mundai sheshim odan ári qabyldanatyn bolady», - dedi Arman Qojahmetov.
Onyń aitýynsha, Prezidenttiń Konstitýtsiiaǵa usynystar daiyndaý jónindegi jumys tobyn qurý tapsyrmasynan keiin Májilistiń Zańnama jáne sot-quqyqtyq reforma komiteti referendým máselelerin retteitin qoldanystaǵy zańnamany qolǵa aldy.
«Respýblikalyq referendým týraly zańnyń 28-baby boiynsha jumysty bastadyq. Biz biýlletenniń formasyn suradyq jáne keiin daýys sanaý kezinde qiyndyqtar týyndaýy múmkin ekenin kórdik. Sondyqtan osyndai túzetý boldy, iaǵni bul bizdiń depýtattarymyzdyń, bizdiń komitettiń bastamashyl zań jobasy. Olar tiisti túzetýler jasap, Parlament Májilisine usyndy», - dedi depýtat.
