QR Konstitýtsiiasyna barlyǵy 56 ózgeris engizilgeli otyr. Bul týraly Ádilet vitse-ministri Alma Muqanova aitty, dep habarlaidy QazAqparat.
«Referendým nátijesinde Konstitýtsiianyń 33 baby boiynsha 56 ózgeris engizilmek. Eger onyń árqaisysyn jeke saýal retinde qarastyrsaq, ár azamatqa jeke 56 biýlleten kerek. Iaǵni ár azamat 56 biýlletendi oqyp, bólek-bólek daýys berýine týra keledi. Biýlletende 1 ǵana saýal bolýdyń sebebi Konstitýtsiiaǵa engiziletin ózgerister bir-birimen tyǵyz bailanysty jáne uqsas. Eger azamat bir ózgeriske qarsy shyqsa, ol ekinshi ózgeriske áserin tigizedi. Al engizilmek ózgerister bir-birimen ushtasyp jatyr», - dedi Alma Muqanova Ortalyq kommýnikatsiialar qyzmeti alańynda ótken baspasóz máslihatynda.
Sondai-aq vitse-ministr qazaqstandyqtardy referendýmǵa belsendi qatysyp, el taǵdyry úshin mańyzdy sheshimdi birge qabyldaýǵa shaqyrdy.
«Árine, ár azamattyń ózgeristermen kelisýi nemese oǵan qarsy shyǵýy óz tańdaýynda. Eń bastysy, sheshimdi oi súzgisinen ótkizip baryp qabyldaǵan jón. Biz demokratiialy elde ómir súrip jatyrmyz. Sondyqtan tańdaý erki bolýy qajet», - deidi ol.
