Búgin UEFA Chempiondar ligasynda shirek finalǵa joldama alǵan taǵy eki komanda anyqtaldy, dep habarlaidy "Ult aqparat".
Esterińizge sala ketelik, dop dodasy 11 naýryzdan keiin koronavirýs indetine bailanysty keiinge shegerildi. Týrnirdiń 1/8 finalyndaǵy tórt oiyn bolyp, qalǵan tórteýi ótkizilmei qalǵan edi.
Shirek finalǵa naýryz aiynda «Leiptsig» (Germaniia), «Atletiko Madrid» (Ispaniia), «Atalanta» (Italiia) jáne «Pari Sen-Jermen» (Frantsiia) komandalary joldama alǵan bolatyn.
Búgin Angliiada jergilikti «Manchester Siti» jáne Ispaniianyń «Real Madrid» komandalary kezdesti. Aǵylshyndar Madridte ótken alǵashqy oiynda 2:1 esebimen basym túsken edi. Sondyqtan «Real Madrid» búgin baryn saldy. Degenmen oiynda «Manchester Siti» sapynan Rahim Sterling 9-minýtta esep ashty. Oǵan 28-minýtta «Real» shabýylshysy Karim Benzema bir golmen jaýap berdi.
Al 68-minýtta aǵylshyn klýbynyń oiynshysy Gabriel Jezýs «Manchester Sitidi» taǵy da alǵa shyǵardy. Kezdesýde aǵylshyn klýby 2:1 esebimen jeńiske jetip, jarystyń kelesi satysyna joldama aldy.
Taǵy bir oiyn Italiiada ótti. Týrinniń «Iýventýsy» óz alańynda Frantsiianyń «Lion» klýbyn qabyldady. Oiynnyń 12-minýtynda «Lion» oiynshysy Mempis Depai penaltiden esep ashsa, oǵan «Iýventýs» sapynan Krishtianý Ronaldý da 43-minýtta penaltiden jaýap berdi.
Krishtianý Ronaldý 60-minýtta taǵy bir márte mergendik tanytyp, óz komandasyn alǵa shyǵardy. Kezdesýde «Iýventýs» 2:1 esebimen basym tústi. Degenmen alǵashqy oiynda 1:0 esebimen jeńiske jetken «Lion» jarysty jalǵastyratyn boldy.
Shirek finalda «Manchester Siti» men «Lion» ózara jup qurady.
Týrnirdiń atalǵan satysyndaǵy taǵy eki oiyn 8 tamyzda ótkiziledi. Bul kúni «Barselona» (Ispaniia) men «Napoli» (Italiia), «Bavariia» (Germaniia) men «Chelsi» (Angliia) komandalary kezdesedi. Oiyndar «Qazaqstan» jáne «Qazsport» telearnalarynan elorda ýaqytymen 00.50-de tikelei efirde kórsetiledi.
Chempiondar ligasynyń qalǵan bóligi Portýgaliia astanasy - Lissabon qalasynda ótedi. Ol segizdik finaly formatynda bolady. Oiyndar 10-23 tamyz aralyǵynda ótkiziledi.
