Elordada Qazaqstan Respýblikasynda mádeniet pen ónerdi nasihattaǵan jýrnalisterge «Altyn Tomiris» syilyǵyn tapsyrý saltanaty ótti, dep habarlaidy "Ult aqparat".
Syilyqty QR Mádeniet jáne sport ministrligi men «Astana Opera» teatry taǵaiyndaǵan. «Altyn Tomiris» alǵash ret tapsyryldy.
QR Mádeniet jáne sport ministri Aqtoty Raiymqulova BAQ ókilderine «Altyn Tomiris» marapattaryn, qurmet gramotalary men «Qazaq operasynyń ańyz adamdary» estelik kitaptaryn tabys etti.
«Altyn Tomiris» músinshesi «Astana Opera» teatry ǵimaratynyń joǵary jaǵyndaǵy kvadriga túrinde jasalǵan. Onda kúime arbanyń tizginin ustaǵan saq patshaiymy Tomiris beinelengen.
Marapattalǵandar qatarynda «Habar 24», «Qazaq TV», «Qazaqstan», «Abai TV», «Mir», «Eýraziia» birinshi arnasy» telearnalary, «Egemen Qazaqstan», «Kazahstanskaia pravda», «Astana Aqshamy», «Vecherniaia Astana», «Novoe pokolenie», «Liter», «Karavan» gazetteri, Tengrinews.kz, Zakon.kz, «QazAqparat» HAA, Sputnik Kazahstan, Nur.kz, Baigenews.kz aqparat agenttikteriniń tilshileri, sonymen qatar tanymal qazaqstandyq blogerler bar.
Saltanatty rásim aiaqtalǵan soń jýrnalisterdi teatrdyń shyǵarmashylyq ujymy quttyqtap, merekelik kontsert tartý etti. Sahnada opera trýppasynyń solisteri – Qazaqstannyń eńbek sińirgen qairatkeri Jamilia Djarkimbaeva, Elena Ganja, Ásem Sembina, Ramzat Balakishiev, Shyńǵys Rasylhan, «KVIKONTE» úrlemeli aspaptar kvinteti jáne kontsertmeister Raýshan Beskembirova óner kórsetti.
