Memleket basshysy Qasym-Jomart Toqaevtyń Qazaqstan halqyna Joldaýy - elimizdiń san salasyndaǵy qordalanǵan máselelerdi sheshýdiń baǵytyn aiqyndaǵan tyń baǵdarlamalyq qujat boldy. QR Mádeniet jáne sport ministri Aqtoty Raiymqulova osyndai pikir bildirdi, dep habarlaidy "Ult aqparat".
«Prezident Joldaýyn mádeniet salasynyń qyzmetkerleri erekshe yqylaspen qabyldady. Qasym-Jomart Kemelulynyń mádeniet qyzmetkerlerine memleket tarapynan saliqaly qoldaý kórsetý týraly tasyrmasy el rýhaniiatynyń jańa deńgeige kóterilýine tyń serpin bereri anyq.
Memleket basshysy «Biz mádeniet salasynda jumys isteitin azamattarǵa jetkilikti túrde kóńil bólmei otyrmyz. Bul - eń aldymen, kitaphana, mýzei, teatr qyzmetkerlerine qatysty másele. Olardyń eńbekaqysy sońǵy jyldary múlde kóbeigen joq. Sonyń saldarynan mádeniet qyzmetkerleri, ásirese jas mamandar jeńildigi bar turǵyn úi baǵdarlamalaryna qatysa almaidy. Mundai ahýal osy kásiptiń bedelin túsirip, laiyqty kadrlardyń tapshylyǵy aiqyn sezilýde» dep atap kórsetti, dep jazdy Aqtoty Raiymqulova Facebook-tegi paraqshasynda.
«Joldaýda aitylǵandai, Prezident tapsyrmasymen kelesi jyly Úkimet tarapynan mádeniet qyzmetkerleriniń eńbekaqysyn kóterý kózdelip otyr. Sonymen qatar, mádeniet salasynyń qyzmetkerlerine bilim berý jáne densaýlyq saqtaý salalaryndaǵy áleýmettik jeńildikter berilýi qarastyrylatyn bolady.
Sondai-aq, Memleket basshysy barlyq jastaǵy azamattardy buqaralyq sportqa tartý arqyly ult densaýlyǵyn nyǵaitý máselesine de nazar aýdarýdy tapsyrdy. «Sport infraqurylymy balalarǵa barynsha qoljetimdi bolýyn qamtamasyz etý qajet. Buqaralyq dene shynyqtyrýdy órkendetý isi jańa chempiondar shyǵatyn piramidaǵa ainalýy tiis. Bul salaýatty ári belsendi jastardyń, túptep kelgende, qýatty ulttyń negizin qalyptastyrady. Osy baǵdardy zańnamalyq turǵydan qamtamasyz etý, buqaralyq sportty damytýdyń Keshendi josparyn qabyldaý qajet. 2020 jyl Volontior jyly dep jariialandy. Eriktiler qyzmetine azamattardyń, ásirese jastardyń, stýdentter men oqýshylardyń qatysý aiasyn keńeitý, olardyń boiynda belsendi ómirlik ustanym daǵdysyn qalyptastyrý - ózekti mindet. Bul - azamattyq qoǵamdy nyǵaitý jónindegi jumysymyzdyń mańyzdy quramdas bóligi» dep atap kórsetti Q. Toqaev.
Joldaýda ekonomikanyń mańyzdy salasy retinde týrizmniń, ásirese eko jáne etnotýrizmniń damýyna basa nazar aýdarý kerek ekenin atap ótti. Týrizmdi damytý úshin qajetti infraqurylymdardy júrgizýdi, sonyń ishinde jol salý, bilikti mamandardy daiyndaýdy qamtamasyz etý qajettigi basa aityldy.
Kelesi jyly ál-Farabi men Abai Qunanbaev tárizdi uly tulǵalardyń mereitoilaryn atap ótý josparlanyp otyr. Oǵan daiyndyq jumystarynyń bastalyp ketkenin bilesizder. Memleket basshysy toilaǵan kezde ysyrapqa jol bermei, ǵulamalardyń eńbekterin halyqqa keńinen taratýǵa shaqyrdy. Sondai-aq, Qazaqstan Respýblikasynyń Táýelsizdiginiń 30 jyldyǵy jaqyndap qaldy. Prezident elimizdiń jas urpaǵynyń boiynda patriotizmdi qalyptastyrýda máni zor merekege laiyqty daiyndalýdyń mańyzy zor ekenin atap ótti.
Memleket basshysy Joldaýda atap ótkenindei, elimiz reformalaýdyń jańa kezeńine aiaq basty. Aldymyzda qyzyqty jáne jaýapty ister kóp, dostar. Elimizdiń Prezidenti Joldaýda aitqan tapsyrmalardy júzege asyryp, sapaly nátijege jumys isteimiz»,-dep atap ótken Mádeniet jáne sport ministri.
