Mádeniet jáne sport ministri Aqtoty Raiymqulova májilismender aldynda QR keibir zańnamalyq aktilerine týristik qyzmet máseleleri boiynsha ózgerister men tolyqtyrýlar engizý týraly zań jobasyn qorǵady, dep habarlaidy QazAqparat.
Ministrdiń aitýynsha, zań jobasy eldiń qabyldanǵan strategiialyq qujattaryna sáikes, týristik salany memlekettik retteýdi jetildirýge, sondai-aq uzaq merzimdi kezeńge arnalǵan Qazaqstannyń ekonomikalyq damý basymdyqtarynyń biri retinde týrizm salasyn damytý úshin qajetti quqyqtyq baza qurýǵa baǵyttalǵan.
«Zań jobasymen qoldanystaǵy zańnamalarǵa birqatar baǵyt boiynsha túzetý engizý josparlanyp otyr. Atap aitqanda uǵymdyq apparatty jetildirý, týrizmdi jikteý, salany memlekettik qoldaýdy quqyqtyq retteýmen bailanysty normalardy qaita qaraý kózdelgen. Memlekettik retteý, ataýly memlekettik qoldaýdy júzege asyrý turǵysynan mańyzdy máseleniń biri - týristik qyzmettiń qazirgi túrleri men baǵyttaryn naqty jikteýdiń joqtyǵy. Osyǵan bailanysty týristik klasterdi damytýdyń strategiialyq josparyn, sondai-aq týristik qyzmettiń jekelegen baǵyttaryn iske asyrý maqsatynda zań jobasynda týrizmdi jikteý kózdelgen», - dedi ministr.
Sondai-aq ministr Basym týristik aýmaq (BTA) uǵymyn engizýdi usyndy.
«Basym týristik aýmaqty engizý – zań jobasynyń negizgi novellasy. Basym týristik aýmaq qurý maqsattary: sinergetikalyq áser esebinen týristik naryqta aýmaqtyń básekege qabiletin arttyrý, týristik klasterge kiretin týristik uiymdar jumysynyń tiimdiligin arttyrý, resýrstardy (materialdyq, ziiatkerlik) týrizmdi damytýdyń neǵurlym perspektivaly núktelerine shoǵyrlandyrý. Basym týristik aýmaq – týristik salaǵa investitsiia men halyqaralyq standarttardy engizýdi kózdeitin is-sharalar kesheni. Aýmaqty (geografiialyq shekaralardy) QR Úkimeti aiqyndaidy», - dedi ol.
