Búgin Qazaqstan Respýblikasynyń Mádeniet jáne sport ministri Aqtoty Raiymqulova Tashkent qalasyndaǵy Forýmdar saraiynda Ózbekstan Respýblikasynyń Mádeniet ministri Bahtiior Saifýllaevpen kezdesti, dep habarlaidy "Ult aqparat".
QR Mádeniet ministrliginiń baspasóz qyzmeti taratqan aqparatqa sáikes, kezdesý barysynda mádeniet ministrleri eki el arasyndaǵy mádeni-rýhani bailanystardyń shynaiy ári jalpyadamzattyq qundylyqtar negizinde berik damyp otyrǵanyn atap ótti.
Qazaqstan Respýblikasynyń Mádeniet jáne sport ministri Aqtoty Raiymqulova 2018 jyl Qazaqstandaǵy Ózbekstan jyly joǵary deńgeide atalyp ótkenine toqtaldy.
«Memleket basshysy Qasym-Jomart Toqaev eki el arasyndaǵy ekonomikalyq, mádeni bailanystardyń nyǵaiyp otyrǵanyna zor baǵa beredi. Biyl Ózbekstandaǵy Qazaqstan jyly baýyrlas elder arasyndaǵy qarym-qatynasty odan ári damytýǵa yqpal etip otyrǵany sózsiz. Sonyń nátijesinde kóktemde eki el ministrleri ózara mádeni yntymaqtastyq negizinde bekitken baǵdarlamaǵa sai 220-dan astam is-shara ótti. El turǵyndary mádeniet, óner, ádebiet, ǵylym, týrizm salasyndaǵy mádeni jáne iskerlik bailanystardyń jańa úlgisine kýá boldy. Ózbekstandaǵy Qazaqstan jyly aiasynda Tashkentte mádeni is-sharalar áli de ótkizilýde. Onyń jarqyn mysaly retinde «Astana opera» memlekettik opera jáne balet teatrynyń «Abai» operasyn, «Madam Batterfliai» qoiylymyn sahnalaýy, «Saltanat» memlekettik bi ansambliniń «Qazaqkontsert» ujymynyń, Qazaqstannyń tanymal ánshileri Roza Rymbaeva men Maqpal Júnisovalardyń jeke kontsert berýi jáne basqa da qazaqstandyq óner ujymdarynyń óner kórsetýi der edim. 2020 jyl álemdik qaýymdastyq uly Abaidyń 175 jyldyǵyn atap ótpekshi. Sonymen qatar, kieli ózbek topyraǵynda Tóle bi men Áiteke bidiń jáne de basqa tarihi tulǵalardyń eskertkishteri bar. Bul eki el tarihynyń tamyry tereńde ekendiginiń jarqyn mysaly. Túrki tildes eki eldiń mádeni bailanystary nyǵaia túsetini meni qýantady. Aldaǵy ýaqyttarda dostyq kópiri berik bolatynyna senim zor», - dedi Aqtoty Raiymqulova.
Óz kezeginde Ózbekstan Respýblikasynyń Mádeniet ministri Bahtiior Saifýllaev Ózbekstannyń Qazaqstandaǵy jyly aiasynda atqarylǵan is- sharalarǵa joǵary baǵa berdi.
«Ózbekstannyń kino kúnderi Qazaqstannyń birqatar qalalarynda, atap aitsaq, Almaty, Taraz, Shymkent, Qyzylordada, Túrkistanda zor qoshemetpen ótti. Qazirgi tańda Ózbekstan astanasy Tashkent qalasyndaǵy kóptegen mektepterde dombyra synyby ashylǵan. Onda qazaq diasporasynyń mektep oqýshylarymen qosa jergilikti ult ókilderi de dáris alýda. Sonymen birge, Ózbekstannyń mádeniet, óner, teatr, estrada maitalmandaryn Qazaqstan jurtshylyǵy zor qurmetpen qarsy alǵanyna shynaiy alǵysymdy jetkizemin. Kóktemdegi kezdesýde qabyldanǵan is-sharalar josparyndaǵy 85 baptyń barlyǵy, naqtylai ketsem bul 220 is-shara joǵary deńgeide atqaryldy. Munyń ózi tamyry bir týys eldiń bir-birine qushaǵy ashyq, kóńili aq, peiili darhan ekendiginiń aiǵaǵy. Mádeniet salasyndaǵy yntymaqtastyq eki el prezidentteriniń kezdesýi aiasynda aldaǵy ýaqytta da júzege asatynyna senimdimin. Qazaqstanda biyl Jastar jyly aiasynda, Sizdiń ministrliktiń uiymdastyrýymen kúni keshe ǵana AQSh tórinde Dimash Qudaibergenniń tamasha kontserti ótti, qutty bolsyn aitamyn», - dedi Bahtiior Saifýllaev.
Eske sala keteiik, erteń Tashkentte Qazaqstan jylynyń resmi jabylýy ótedi. Sol kúni Aqtoty Raiymqulova Tashkentte taý shyńǵysy kýrortynyń saltanatty ashylý rásimine qatysyp, týrizm salasy boiynsha birlesken memorandýmǵa qol qoiady. Al keshkisin eki el mádeniet ministri Forýmdar saraiynda ótetin Qazaqstannyń Ózbekstandaǵy jylynyń resmi jabylý saltanatyna qatysady.
