Abai – ýaqyt pen qorshaǵan ortadan joǵary kóterilip, jalpy adamzattyq uly qundylyqtar deńgeiine jetken rýhani bairaǵymyz. «Ulttyq aýdarma biýrosy» qoǵamdyq qorynyń atqarýshy direktory Raýan Kenjehanuly osyndai pikir aitty, dep habarlaidy QazAqparat.
«Meniń oiymsha, Abai kúnin belgileýge, Abaidyń rólin aiqyndaýǵa memlekettiń, Prezidenttiń nazar aýdarýy óte durys jáne qajet dúnie. Ókinishtisi, Abai elimizdegi bas aqyn ekeni týraly ǵana aitylatyn kezeń de bolǵan. Al shyn máninde Abai - ýaqyt pen qorshaǵan ortadan joǵary kóterilip, jalpy adamzattyq uly qundylyqtar deńgeiine jetken rýhani bairaǵymyz. Abai óz týyndylary arqyly máńgilik qundylyqtar týraly aityp, qalai ómir súrý kerektigi týraly jol kórsetken. Ol ar-ojdandy joǵary qoiyp, adamzattyń bárin baýyryndai jaqsy kórý kerektigin nasihattady. Onyń ulylyǵy osynda», - deidi Raýan Kenjehanuly.
Onyń aitýynsha, Ulttyq aýdarma biýrosy Abaidyń shyǵarmalaryn 10 tilge aýdarý jumysyna basshylyq etýde.
«Jaýapkershilikti sezine otyryp, aýdarmanyń sapasy jaqsy bolýy úshin qoldan kelgennniń bárin jasadyq. Jumysqa 10 til men mádenietin jaqsy biletin bedeldi basylym uiymdary tartyldy. Bul jumys 10 memlekettiń astanasynda tájiribeli ǵalymdar men lingvist, ádebiettanýshylardyń kómegimen júzege asty. Jumys aiaqtalyp qaldy. Jobaǵa qatysýshylardyń bári Abai muralary arqyly Qazaqstan mádenietin nasihattap júrgen bedeldi adamdar», - deidi ol.
