Saiasattanýshy Rasul Jumalynyń áleýmettik jelidegi pikirinshe búginderi qoǵamdyq keńesterdiń paidasy men mańyzy kezekti kórinis tapty.
«Nur-Otan» partiiasynyń janyndaǵy Ekonomikany damytý men kásipkerlikti qoldaý boiynsha qoǵamdyq keńes Qarjy ministrligin qatqyl synǵa aldy. Atalǵan vedomstvo basshysynyń Prezident Qasym-Jomart Toqaevtyń shaǵyn jáne orta biznesti memoryndardyń tekserýine qatysty jariialaǵan moratoriige qarymta tekseristerdi qaita qolǵa alatynyn málimdegeni belgili.
Osy oraida tanymal saiasattanýshy Rasýl Jumaly bundai qiǵash áreket tek joǵarǵy basshylyqtyń tapsyrmasyn burmalap oǵan eregesýdi ǵana bildirmeitindigin aitady.
Prezident kózdegen maqsat – salyq júiesin ońtailandyryp kásipkerlerdi odan jaltarýǵa emes, qaita múddeli bolýǵa yntalandyrý. Ainalyp kelgende bul qadam biznesti kóleńkeden shyǵaryp zańdy ári ashyq túrde jumys isteýine jol ashpaq, deidi saiasattanýshy.
«Kórip otyrǵanymyzdai ministrlik tapsyrmany keshendi túrde oryndaýdyń ornyna baiaǵy ses kórsetý ánine basyp otyr. Al onysy kásibilik pen memlekettik sana-sezimniń tapshylyǵyn bildiredi. Osyndai eskishil ustanymdy Qoǵamdyq keńestiń der kezinde nysanaǵa alǵany quptarlyq is. Endi úkimet te, ministrlik te osydan durys sabaq alǵany jón. Bul jaily memleket basshysynyń ózi "Qoiylǵan mindetten jaltaratyndar qyzmetten ketsin" - dep anyq eskertti de. Taǵy bir másele - osyndaida óńirlik deńgeide qurylǵan qoǵamdyq keńester nege únsiz? Onyń ústine shaǵyn jáne orta biznes ókilderi kóbine jergilikti ákimshilikke kiriptar bolyp otyrǵanda. Saiyp kelgende qoǵamdyq keńestiń basty mindeti sol qoǵamnyń, onyń ishinde kásipkerlerdiń múddesin qorǵaý emes pe edi? Dál osyndai ýájdi ózin oppozitsiia sanaityn biraq jeme-jemge kelgende jii tasada qalyp qoiatyn parlamenttegi partiialarǵa qatysty da aitýǵa bolar», - dep jazdy Jumaly áleýmettik jelidegi óziniń paraqshasynda.
Esterińizge salsaq, Qarjy ministri Erulan Jamaýbaev shaǵyn biznesti tekserýge ruqsatty qaitaryp, 2019 jylǵy jeltoqsanda Prezident Qasym-Jomart Toqaev jarlyqpen engizgen moratoriidi alyp tastaýdy usynǵan bolatyn.
