Sheshenstan basshysy Ramzan Qadyrov kommýnister kósemi Vladimir Leninniń múrdesin jerleýge shaqyrdy. "Ólikke qarai berip, jeter endi" dep jazdy Qadyrov Telegram-daǵy kanalynda. Onyń pikirinshe, "Reseidiń dál ortalyǵynda, Qyzyl alańda óli adamnyń tabyty turǵany durys emes".
Buǵan deiin Resei Federatsiia keńesiniń basshysy Valentina Matvienko Lenindi jerleý máselesi boiynsha referendým ótkizý múmkindigi týraly aitqan. Munyń aldynda Resei oppozitsiiasynyń ókilderi de revoliýtsionerdiń máiitin jerleýdi birneshe ret usynǵan.
Leninniń múrdesin jerleý týraly málimdeme jasaǵandardyń biri telejúrgizýshi, 2018 jylǵy prezident sailaýyna túsý nieti bar Kseniia Sobchak boldy. Ol Reseidiń basty alańynda adam múrdesiniń jatýyn "eldegi turmys saltynyń orta ǵasyrlyq deńgeide ekenin kórsetedi" dep atady.
Resei prezidenti Vladimir Pýtin 2016 jyly Leninniń múrdesin jerleýge qarsy shyqqan. Ol bul máselege qatysty "qoǵamda jik týdyrmaý úshin muqiiat bolýǵa" shaqyrǵan.
